सुर्खेत ।
कर्णाली राजमार्गअन्तर्गत वर्षौँदेखि अलपत्र अवस्थामा रहेका १० वटा रुग्ण ठेक्काहरू एकैपटक तोड्ने प्रक्रिया सुरु गरिएको छ । सडक डिभिजन कार्यालयले लामो समयसम्म प्रगति नभएका र निर्माण कार्य ठप्प भएका ठेक्काहरू खारेज गर्ने निर्णय गरेको हो । कार्यालयका अनुसार ठेकेदार कम्पनीहरूले सम्झौताअनुसार काम नगरेपछि पटक–पटक ताकेता गर्दा पनि सुधार नआएकाले अन्ततः ठेक्का तोड्ने प्रक्रिया अघि बढाइएको छ ।
यसअघि यी आयोजनाहरू विभिन्न कारणले प्रभावित हुँदै आएका थिए, जसका कारण स्थानीय बासिन्दाले सास्ती खेप्दै आएका थिए । सडक डिभिजन कार्यालयले ठेक्का तोडिएसँगै नयाँ प्रक्रियामार्फत पुनः ठेक्का आह्वान गर्ने तयारी समेत थालेको जनाएको छ । लामो समयसम्म काम नगर्ने ठेकेदारलाई कारबाही गर्दै निर्माण कार्यलाई गति दिन यो निर्णय गरिएको हो ।
स्थानीय तह र सरोकारवालाहरूले पनि उक्त निर्णयको स्वागत गरेका छन् । उनीहरूले समयमै सडक निर्माण सम्पन्न भएमा आवतजावतमा सहजता आउने र क्षेत्रीय विकासमा टेवा पुग्ने विश्वास व्यक्त गरेका छन् । यस कदमसँगै कर्णाली राजमार्गको निर्माण कार्यले नयाँ गति लिने अपेक्षा गरिएको छ । कार्यालयले ठेक्का सम्झौता गरेर पनि समयमा काम सम्पन्न नगर्ने ६ वटा निर्माण कम्पनीको ठेक्का अन्त्य गरिएको सम्बन्धी १५ दिने सार्वजनिक सूचना सार्वजनिक गरेको छ ।
जुम्ला सडक डिभिजन कार्यालयका सूचना अधिकारी सौरभकुमार सिंहले राजमार्ग अन्तर्गतका कालीकोट जिल्लाको दहीखोला मान्म–नाग्म जुम्ला खण्डमा शाखा सडकमा सडक सुरक्षा कार्यहरू व्यवस्थापन र जुम्लाको कुडारीदेखि कालीकोटसम्म सडकको कल्भर्ट निर्माण र संरक्षण कार्यको ठेक्का तोडिएको बताए ।
यी कार्य गर्नका लागि आव २०७८–०७९ धुर्वा निर्माण सेवा सुर्खेतसँग सम्झौता भई उल्लेखित मितिमा निर्माण सम्पन्न गर्नुपर्ने सम्झौता थियो । तर सो काम हुन नसकी पटकपटक म्याद थप गरिएको र थपिएको म्याद पनि समाप्त भइसकेकाले ठेक्का तोडिएको सूचना अधिकारी सिंहको भनाइ छ । त्यसैगरी, कर्णाली राजमार्ग सडकखण्ड अन्तर्गतको कालीकोटको बालीघाट नजिकै विशेष मर्मत कार्य र खुल्लालेदेखि घोडेङ्गासम्म आवधिक मर्मतसम्भार कार्यको ठेक्का तोडिएको छ ।
यसका लागि आव २०७९–०८० मा कृष्ण निर्माण सेवासँग सम्झौता भए पनि तोकिएको समयमै निर्माण कम्पनीले काम गर्न नसकेकाले ठेक्का तोकिएको हो । आव २०७९–०८० मा अविनास निर्माण सेवासँग नाग्म–गमगडी सडकखण्डको मुगुको ताल्चादेखि रारासम्म सडकको विशिष्ट मर्मतकार्यको सम्झौता भएको थियो ।
सडक सुधारको काम तुमदेखि लामाचौर सडक राराको प्रतक्की मार्ग च्यनाथ रारा संरचना फराकिलो र फुटपाथको काम विनाम्रा निर्माण सेवा सुर्खेतसँग आव २०८०–०८१ मा भएको सम्झौताअनुसार काम नभएपछि पटकपटक ताकेता गरेको र धेरैपटक भन्दा पनि काम नभएपछि ठेक्का तोड्ने प्रक्रियाअघि बढेको सूचना अधिकारी सिंहले जानकारी दिए ।
यसअघि कर्णाली राजमार्गका चारवटा रुग्ण अवस्थामा रहेका ठेक्का सडक डिभिजन कार्यालयको आफ्नो कार्यक्षेत्रभित्र पर्ने कालीकोटका दुई, मुगुको नाग्म–गमगडी सडकखण्डको एक र जुम्ला डोल्पा हुँदै मनाङ–मुस्ताङ जोड्ने सडक गरी चारवटा ठेक्का तोडिएको थियो ।
सडक डिभिजन कार्यालयका निमित्त डिभिजन प्रमुख श्रवणकुमार महताराका अनुसार निर्माण व्यवसायीलाई लिखित तथा मौखिक रूपमा कार्य सम्पन्न गर्न पटकपटक अनुरोध गर्दा पनि निर्माण कम्पनीले ठेक्का सम्झौताका सर्तहरूबमोजिम आफ्नो करारीय दायित्व पूरा नगरेको हो ।त्यसैले सार्वजनिक खरिद ऐन, २०६३ को दफा ५९(२)अनुसार ठेक्का अन्त्य गरिएको सडक डिभिजन कार्यालयले जनाएको छ ।
यसअघि पूर्वऊर्जा, भौतिक पूर्वाधार तथा यातायात र सहरी विकासमन्त्री कुलमान घिसिङले ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मातहतका निकायलाई निर्देशन दिएका थिए ।
प्रतिक्रिया दिनुहोस्