धनगढी ।
कैलालीको धनगढीमा आगामी माघ १९ गतेदेखि २८ गते (फेब्रुअरी १ देखि १०) सम्म आयोजना हुने अर्जुन ट्रफी राष्ट्रिय क्रिकेट प्रतियोगिताका लागि कैलालीको सीवाईसी अत्तरियाले चार जना राष्ट्रिय खेलाडी अनुबन्ध गरेको छ ।
गो ड्रिमर्सको आयोजनामा यस वर्षदेखि नेपाल क्रिकेट संघको वार्षिक क्यालेन्डरमा समावेश भएको प्रतियोगिताका लागि भीम सार्की, विवेक यादव, साहव आलम र रसिद खानले सीवाईसी अत्तरियाबाट खेल्ने भएका हुन् ।
हालै सम्पन्न नेपाल प्रिमियर लिगमा भीम, साहब र रसिदले काठमाडौँ गोर्खाजबाट खेलेका थिए । विवेकले लुम्बिनी लायन्सबाट खेलेका थिए । सीवाईसीले ए क्याटागोरीका चार जना खेलाडी अनुबन्ध गरिसकेको छ भने बी क्याटागोरीका पाँच जना खेलाडी गरी ९ जना खेलाडीहरूलाई राखेर टिम निर्माण गरिरहेको छ ।
बी क्याटोगोरीबाट सीवाईसीले सन्तोष कार्की, तृप्त दास, दिपेश कँडेल, शंकर राना र सन्दीप क्षेत्रीलाई टिममा समावेश गरेको छ । सी क्याटागोरीका खेलाडीहरूको छनोट कार्य भइरहेको र केही दिनमा १४ सदस्यीय टिमको घोषणा गरिने प्रशिक्षक रजत शाहीले जानकारी दिए ।
धनगढी र सुदूरपश्चिम प्रदेशको क्रिकेटका सारथी रहेका स्वर्गीय अर्जुन खड्काको स्मृतिमा आयोजना गर्न लागेको अर्जुन ट्रफीमा झन्डै २० लाख नगद पुरस्कार प्रदान गरिनेछ । रनिङ ट्रफीको रूपमा टी–२० फम्र्याटको प्रतियोगिताको विजेताले नगद १० लाख र उपविजेताले नगद ५ लाखसहित ट्रफी पाउनेछन् ।
प्रतियोगिताको सर्वोकृष्ट खेलाडीलाई नगद १ लाख प्रदान गरिनेछ । उत्कृष्ट ब्याट्सम्यान, उत्कृष्ट बलर र उदीयमान खेलाडीले जनही ५०÷५० हजार पाउनेछन् । प्रत्येक खेलका म्यान अफ द म्याचलाई नगद १० हजार प्रदान गरिनेछ । लिगकम नकआउटका आधारमा आयोजना हुने प्रतियोगिताका सम्पूर्ण खेलहरू धनगढीस्थित फाप्ला अन्तर्राष्ट्रिय क्रिकेट मैदानमा आयोजना गरिनेछन् ।
प्रतियोगितामा देशभरका ८ वटा क्लबका टिमहरूको सहभागी रहनेछन् । प्रतियोगितामा डीसीए धनगढी, सीवाईसी अत्तरिया, क्रिकेट एक्सिलेन्स सेन्टर (सीईसी) काठमाडौँ, फ्रेन्ड्स युथ क्लब डडेल्धुरा, घोडाघोडी–११ सुख्खड, न्यु होराइजन बुटवल, दशरथ चन्द एकेडेमी बैतडी र वोस्टन क्रिकेट झापाको सहभागिता रहेछ ।
प्रतियोगितामा सहभागी टोलीमा ए क्याटागोरीका चार जना, बी क्याटागोरीका पाँच जना र बाँकी सी क्याटागोरीका गरी १४ खेलाडी समावेश गर्न पाइनेछ । ए क्याटागोरीमा नेपाली राष्ट्रिय टिमका खेलाडी रहेका छन् भने बी क्याटागोरीमा नेपाली राष्ट्रिय टिम ए, यु–१९ नेपाली राष्ट्रिय टोली र प्रदेशस्तरीय सिनियर खेलाडी रहेका छन् । सी क्याटागोरीमा यु–१६ नेपाली राष्ट्रिय टोली, प्रदेशका यु–१९ र यु–१६ का खेलाडी र अन्य खेलाडीहरू रहेका छन् ।
प्रतिक्रिया दिनुहोस्