नेपालगन्जस्थित कृषि विकास बैंकको २४ बढी कोठाको खाली भवन प्रयोगमा ल्याइँदै

लुम्बिनी प्राविधिक विश्वविद्यालयले नेपालगन्जमा प्रयोगविहीन अवस्थामा रहेको कृषि विकास बैंकको तत्कालीन क्षेत्रीय कार्यालय रहेको धम्बोझी चोक नजिकै रहेको तीन तले भवनलाई प्रयोगमा ल्याउने भएको हो । साना ठूला गरी २४ भन्दा बढी कोठाहरू भवनमा रहेका छन् ।

नेपालगन्ज ।

लुम्बिनी प्राविधिक विश्वविद्यालयले नेपालगन्जमा प्रयोगविहीन अवस्थामा रहेको एक सरकारी भवनलाई प्रयोगमा ल्याउने भएको छ । कृषि विकास बैंकको तत्कालीन क्षेत्रीय कार्यालय रहेको धम्बोझी चोक नजिकै रहेको तीन तले भवनलाई प्रयोगमा ल्याउने भएको हो । करिब दुई वर्षअघि कृषिको क्षेत्रीय कार्यालय नेपालगन्जबाट दाङ सारिएपछि उक्त भवन प्रयोगविहीन अवस्थामा रहेको थियो ।

उक्त भवनलाई अहिले लुम्बिनी प्राविधिक विश्वविद्यालयले पाँच वर्षका लागि प्रयोग गर्न पाउनेगरी अनुमति प्राप्त गरेको लुम्बिनी प्राविधिक विश्वविद्यालयका रजिष्ट्रार रेगबहादुर भण्डारीले जानकारी दिए । विश्वविद्यालयले उक्त भवनलाई इन्जिनियरिङ संकायको अध्यापन गराउने प्रयोजनका लागि प्रयोग गर्न लागेको उनले मिसन टुडेलाई बताए ।

कात्तिक ३० गतेदेखि सिभिल इन्जिनियरिङको प्रवेश परीक्षा हुन लागेको र मंसिर १५ गतेदेखि भवनबाट कक्षाहरू सञ्चालन गरिने रजिष्ट्रार भण्डारीको भनाइ छ । सिभिल इन्जिनियरिङतर्फका कोर्शमा ४८ जनाको कोटा रहेको छ । कृषि विकास बैंकको भवनमा साना ठूला गरी २४ भन्दा बढी कोठाहरू रहेको उनले बताए । रजिष्ट्रार भण्डारीले भने, ‘यो भवनले हामीलाई धेरै सहज हुन्छ । ५ वर्षसम्म हामी ढुक्कले यहाँबाट शैक्षिक गतिविधिहरू सञ्चालन गर्न सक्छौँ । त्यसपछि त खजुरामा पनि जग्गा प्राप्ति भइसक्छ भन्ने आशा छ ।’

लुम्बिनी प्राविधिक विश्वविद्यालयले हाल नेपालगन्जस्थित वन कार्यालयको परिसरको भवनमा केन्द्रीय कार्यालय राखेर आफ्ना गतिविधिहरू सञ्चालन गरिरहेको छ । अहिले विश्वविद्यालयमा सूचना प्रविधितर्फ बिटेक इन आइटी र बिटेक इन कम्प्युटर साइन्स एन्ड आर्टिफिसियल इन्टेलिजेन्सको पढाइ भइरहेकोमा अब इन्जिनियरिङतर्फ बिटेक इन सिभिल र बिटेक इन आइटी इन्जिनियरिङको पढाइका लागि प्रक्रिया सुरु गरिएको उनले बताए ।

विश्वविद्यालयका लागि खजुरा गाउँपालिका वडा नम्बर ८ रनियापुरमा ८६ बिघा जग्गा दिनका लागि खजुरा गाउँपालिकाले सिफारिस दिइसकेको छ । तर, केन्द्र सरकारका कारण विश्वविद्यालय स्थापना भएको दुई वर्षसम्म पनि जग्गा विश्वविद्यालयको नाममा भने आउन सकेको छैन । विश्वविद्यालयलाई खजुरा गाउँपालिकाले अहिले कार्यालय सञ्चालन भइरहेको भवन पनि प्रयोगका लागि दिइसकेको छ ।