मतदाताप्रति आभार, विजयी उम्मेदवारलाई बधाई

नेपालगन्ज ।

प्रतिनिधिसभा सदस्य निर्वाचनअन्तर्गत बाँके क्षेत्र नं. २ बाट नेपाली काँग्रेसका तर्फबाट उम्मेदवारी दिएका सुधान्शु कोइरालाले मतदाताप्रति आभार व्यक्त गरेका छन् । उनले चुनावी परिणामलाई सम्मान गर्दै विजयी उम्मेदवारलाई बधाई पनि दिएका छन् ।

कोइरालाले मंगलबार एक प्रेस नोट जारी गर्दै लोकतन्त्रमा जनताको निर्णय नै सर्वोच्च हुने उल्लेख गरेका छन् । निर्वाचनको क्रममा प्रत्यक्ष वा अप्रत्यक्ष रूपमा साथ दिएका समर्थक, पार्टीका साथीहरू, शुभेच्छुक तथा नेपाली काँग्रेसको चुनाव चिह्न ‘रुख’मा मतदान गर्ने सम्पूर्ण मतदाताप्रति उनले धन्यवाद व्यक्त गरेका छन् ।

उनले मतदाताको विश्वास र मायाले आफूलाई केवल उम्मेदवार मात्र नभई जनताको सेवक बन्ने प्रेरणा दिएको पनि बताएका छन् । पार्टीले विश्वास गरेर उम्मेदवार बनाएकोमा उनले नेपाली काँग्रेसका सभापति गगनकुमार थापा तथा सम्पूर्ण नेतृत्वप्रति पनि आभार प्रकट गरेका छन् ।

कोइरालाले बाँके क्षेत्र नं. २ का आमाबुबा, दाजुभाइ तथा दिदीबहिनीहरूको विश्वास, स्नेह र आत्मीयताले आफूलाई सधैँ बलियो बनाइरहने उल्लेख गरेका छन् । उनले निर्वाचन परिणाम आफ्नो पक्षमा नआए पनि जनताको सेवा गर्ने आफ्नो संकल्पमा कुनै कमी नआउने स्पष्ट पारेका छन् ।