घटनाबारे चासो देखाउँदै प्रधानमन्त्री सुशीला कार्कीले घटनाबारे छानबिन गर्न गृह मन्त्रालयलाई निर्देशन दिएकी थिइन् ।प्रधानमन्त्री कार्कीको निर्देशनलगत्तै गृह मन्त्रालयले तीन सदस्यीय छानबिन समिति गठन गरेर घटनाको अनुसन्धान गरिरहेको छ । बर्दिया पुगेर अनुसन्धान गरिरहेको समितिले पाँच दिनभित्र घटनाको छानबिन गरेर प्रतिबेदन पेश गर्नेछ । घटनाबारे समिति, जिल्ला प्रहरी कार्यालय र राष्ट्रिय मानव अधिकार आयोगले समेत अनुसन्धान गरिरहेका छन् ।
कोहलपुर (बाँके) ।
बर्दियाको बढैयाताल गाउँपालिका वडा नम्बर ४ दक्षिण भकारीमा एकैघरका बाबुछोरीले नागरिकतामा विभेद भोगेपछि आत्महत्याको बाटो रोजेको घटनाको छानबिन गर्न गृह मन्त्रालयद्वारा गठिन छानबिन समितिले छानबिन सुरु गरेको छ । स्थानीय निकाय र प्रशासनले नागरिकता नदिएर विभेद गरेपछि बाबुछोरीले नै पीडा सहन नसकेर आत्महत्याको बाटो रोजेको घटनाका बारेमा छानबिन गर्नका लागि गृह मन्त्रालयद्वारा गठित समिति मंगलबार बर्दिया पुगेको हो । समितिले बुधबारदेखि घटनास्थल पुगेर अनुसन्धान सुरु गरेको हो ।
लामो समयसम्म सरकारी निकायमा नागरिकताका लागि प्रयास गर्दासमेत नागरिकता नपाएपछि २२ कात्तिकमा घरमै दक्षिण भकारीकी २१ वर्षीया अञ्जु थारुले आत्महत्या गरेकी थिइन् । छोरीको न्यायका लागि संघर्ष गर्दै आएका ६१ वर्षीय कान्छा थारुले समेत छोरीले आत्महत्या गरेको ४ दिनपछि सोही बाटो अपनाएका थिए । नागरिकता नपाएकै कारण बाबुछोरीले आत्महत्याको बाटो रोजेको घटनामा प्रधानमन्त्री सुशीला कार्कीले घटनाबारे चासो देखाएकी थिइन् ।
सामाजिक सञ्जाल फेसबुकमा प्रधानमन्त्री कार्कीले भनेकी थिइन्, ‘न्यायिक–प्रशासनिक झमेलाका कारण यो अवस्था निम्तिएको हो भने देशको प्रधानमन्त्रीका रूपमा म माफी चाहन्छु र यस घटनाको गहिराइमा पुगेर अध्ययन गर्न माननीय गृहमन्त्रीज्यूलाई निर्देशन दिएकी छु,’ प्रधानमन्त्री कार्कीले नागरिकतालगायत लैंगिक आधारमा हुने कुनै पनि प्रकारको विभेद र हिंसा सह्य नहुने बताइन् । उक्त घटनाको छानबिन गर्न गृह मन्त्रालयलाई निर्देशन दिएकी थिइन् ।
प्रधानमन्त्री कार्कीको निर्देशनलगत्तै गृह मन्त्रालयले बर्दिया घटना छानबिन गर्न तीन सदस्यीय छानबिन समिति गठन गरेको थियो । समितिको संयोजक गृहका सहसचिव तथा नीति, योजना अनुगमन तथा मूल्यांकन महाशाखा प्रमुख सुरेश पन्थी छन् । मन्त्रालयकै उपसचिव कुलशेखर अर्याल र बर्दियाका सहायक प्रमुख जिल्ला अधिकारी अशोककुमार भण्डारी सदस्य रहेका छन् । गृह मन्त्रालयले समितिलाई पाँच दिनको कार्यावधि तोकेको छ ।
घटनाको छानबिनका लागि समितिका संयोजक पन्थी र सदस्य अर्याल बर्दिया पुगिसकेको जिल्ला प्रशासन कार्यालय बर्दियाले जनाएको छ ।समितिका सदस्य तथा बर्दियाका सहायक प्रमुख जिल्ला अधिकारी अशोककुमार भण्डारीले समितिले बढैयातालमै पुगेर घटनाको अनुसन्धान गरिरहेको बताए । छानबिन समितिको सहयोगमा मृतक अञ्जु थारुकी सात वर्षीया छोरी अनिताको जन्म दर्ता र आमा अञ्जुको मृत्यु दर्ता सम्पन्न भएको छ । उनले भने, ‘समितिले छानबिन सुरु गरेको छ । पहिलो दिन घटनास्थल पुगेर प्रारम्भिक चरणको सोधपुछ भएको छ ।
अब थप सोधपुछ सुरु हुन्छ । घटनासँग सम्बन्धित व्यक्तिहरुसँग बयान लिने काम हुन्छ । हामीलाई तोकिएको भन्दा केही समय लाग्न सक्छ ।’
घटनाबारे जिल्ला प्रहरी कार्यालय बर्दियाले समेत छानबिन गरिरहेको छ । परिवारले अञ्जुका श्रीमान् अनिल थारुविरुद्ध आत्महत्या दुरुत्साहन मुद्दा दर्ता गरेको छ । कार्यालयका सूचना अधिकारी प्रकाशसिंह कार्कीले थारुविरुद्ध मुद्दा दर्ता भएर पक्राउ पुर्जीसमेत जारी गरिएको बताए । उनका अनुसार अञ्जुका श्रीमान् हाल फरार अवस्थामा छन् । मृतक अञ्जु र अनिलबीच १४ वर्षको उमेरमै प्रेम सम्बन्ध थियो । १५ वर्षको उमेरमा उनीले विवाह गरेका थिए ।
बर्दिया प्रहरीका अनुसार अञ्जुले २०६५ सालमा छोरी जन्माइन् । छोरीको जन्म भएपछि श्रीमान् श्रीमतीबीच सम्बन्ध सुमधुर भएन । पारिवारिक कलह बढ्दै गएपछि २०७६ सालमा अञ्जुले अंश माग गर्दै जिल्ला अदालतमा मुद्दा दर्ता गरेकी थिइन् । यता माइती पक्षबाट नागरिकताका लागि उनले स्थानीय वडा कार्यालयमा समेत निवेदन दिएकी थिइन् । सोको लागि उनले जिल्ला प्रशासन कार्यालयसमेत धाइन् । वैवाहिक जीवनमा असफलता, राज्यका निकायहरुबाट एकपछि अर्को विभेदपछि उनले अन्त्यमा आत्महत्याको बाटो रोजिन् । सो घटनाका सम्बन्धमा सरकारकै सक्रियतामा अहिले घटनाबारे अनुसन्धान सुरु गरिएको हो ।
प्रतिक्रिया दिनुहोस्