राजापुरमा हात्तीको आक्रमणमा एकजनाको मृत्यु

बर्दिया ।

बर्दियाको राजापुर नगरपालिका–१० झप्टीमा हात्तीको आक्रमणमा एकजनाको ज्यान गएको छ । भारत उत्तरप्रदेश बहराईच जिल्लाअन्तर्गत कतरनियाघाट वन्यजन्तु आरक्षबाट निस्केको हात्तीले बिहीबार दिउँसो आक्रमण गर्दा स्थानीय एक जनाको मृत्यु भएको हो ।

हात्तीको आक्रमणबाट स्थानीय कान्छु थारूको मृत्यु भएको इलाका प्रहरी कार्यालय राजापुरले जनाएको छ । प्रहरीका अनुसार कतरनियाघाट वन्यजन्तु आरक्षबाट निस्केको हात्तीले थारूलाई आक्रमण गरेको थियो ।

बर्दिया राष्ट्रिय निकुञ्जका वरिष्ठ प्रमुख संरक्षण अधिकृत डा. अशोक रामले थारूलाई भारतबाट नेपाल आउँदै गर्दा हात्तीले आक्रमण गरेको जानकारी दिए । घटना सदरमुकाम गुलरियादेखि पश्चिम करिब २५ किमि दुरीमा भएको जिल्ला प्रहरी कार्यालय बर्दियाले जनाएको छ ।