साथीभाइको आशीर्वादले म उत्साहित छु

चण्डी गैरे वरिष्ठ उपाध्यक्ष पदका उम्मेदवार लोकतान्त्रिक समावेशी व्यवसायी समूह

१. तपाईं वरिष्ठ उपाध्यक्षका लागि चुनाव लडिरहँदा व्यापारी मतदाताहरूबाट कस्तो प्रतिक्रिया पाइरहनुभएको छ ?

म निर्वाचनमा होमिनुअघि अप्ठ्यारो महसुस भएको थियो । जब म व्यवसायीहरूको घरदैलोमा पुगेँ । उहाँहरूले दिएको माया, आश्वासन र स्नेह मेरा लागि अमृतसरह भएको छ ।

सबै व्यवसायीहरूले राम्रो प्रतिक्रिया हौसला दिनुभएको छ जसले मलाई ऊर्जा मिलेको छ । मलाई उहाँहरूले सल्लाह, सुझाव र आशीर्वाद दिएर सहयोग गर्ने आश्वसन दिनुभएको छ । यसले गर्दा म धेरै उत्साहित छु ।

२. तपाईंको उम्मेदवारी किन र केका लागि ?

म २०७४ सालदेखि निरन्तर उद्योग वाणिज्य संघमा जोडिएर काम गर्दै आएको छु । सुरुवातका दिनमा एक कार्यकाल सदस्य, उद्योगतर्फ उपाध्यक्ष हँुदै अहिले वरिष्ठ उपाध्यक्षको रूपमा निर्वाचनमा होमिएको छु । मेरो उम्मेदवारी किन भने ? उद्योग वाणिज्य संघमा क्रमबद्ध रूपमा नेतृत्वमा पुग्नुपर्छ भन्ने मेरो मान्यता हो ।

एकैपटक अनुभव नबटुली अध्यक्षमा लड्दा काम गर्न गाह्रो हुन्छ । क्रमिकरूपमा माथि जाने हो भने बल्ल सक्षम नेतृत्वदायी भूमिका खेल्न सकिन्छ । त्यसैले यो अवधिमा मैले बटुलेको अनुभवका आधारमा नै म वरिष्ठ उपाध्यक्षका लागि उम्मेवार बनेको हँु । अर्काे कार्यकाल अध्यक्षको उम्मेदवारको रूपमा बलियो खम्बाका रूपमा स्थापित हुन मैले वरिष्ठ उपाध्यक्षको उम्मेदवारी दिएको हँु ।

३. तपाईंको नजरमा यहाँका व्यवसायीहरूका मुख्य समस्या के–के हुन् ?

व्यवसायीहरूका समस्याहरू धेरै छन् । घर भाडा, चर्काे बैंक ब्याजदर, सटरहरू खाली र नजिकै रहेको खुला सिमानाका कारण धेरै समस्या छन् ।

४. अहिलेको चुनावमा व्यवसायीहरू कतिको उत्साही भएको पाउनुभएको छ ?

म पहिलाको निर्वाचनमा लड्दा व्यवसायीहरूमा उत्साह धेरै थियो । अहिले व्यवसायीहरूको त्यो पहिलाको जस्तो उत्साह केही कम भएको छ । यति मात्र नभई पहिलाको तुलनामा खर्च पनि कम हुन्छ, मतदाताहरू पनि कम छन् ।

५. निर्वाचित भए के–के काम गर्छु भनेर प्रतिबद्धता जनाउनुहुन्छ ?

हामीले विगतका वर्षहरूमा जनाएका प्रतिबद्धताहरू पनि सबै पूरा गरेका छौँ । र यो वर्ष हामीले व्यवसायी, घरधनी तथा घरबहालसम्बन्धी समस्यालाई निराकरण गर्न, व्यवसायीलाई पुनरुत्थान सहयोग, व्यावसायिक राहत कोष स्थापनालगायतका २१ वटा प्रतिबद्धता गरेका छौँ ।