16 July 2024  |   मङ्लबार, साउन १, २०८१

साइन्स र म्यानेजमेन्ट कक्षा सञ्चालन गर्दै कोहलपुरको जीवन ज्योति स्कुल

मिसनटुडे संवाददाता
प्रकाशित मितिः सोमवार, असार २५, २०८१  

पहिलो ब्याचमै २०८० को एसइई परीक्षामा ४१ जना विद्यार्थी सहभागी गराएकोे विद्यालयले शतप्रतिशत नतिजा ल्याउन सफल भएको थियो । एसइईमा सहभागी ४१ जना विद्यार्थीमध्ये २७ जना ए र १४ जना ए प्लस ल्याएर उत्तीर्ण भएका थिए । पहिलो ब्याचका विद्यार्थीहरूले नै ए र ए प्लससहित शतप्रतिशत नतिजा ल्याउनुमा शिक्षक र विद्यार्थीहरूको अथाह मेहेनत र परिश्रम रहेको प्रधानाध्यापक जोमन जेम्सले बताए ।

कोहलपुर ।

कोहलपुर नगरपालिका–१० रामनगरमा अवस्थित जीवन ज्योति माविले यस शैक्षिक सत्रबाट साइन्स र म्यानेजमेन्ट कक्षा सञ्चालन गर्ने भएको छ । अत्याधुनिक ल्याबसहित विद्यालयले कक्षा ११ मा साइन्स र म्यानेजमेन्ट पठनपाठन गर्ने भएको हो ।

विद्यालयले अहिले विद्यार्थी भर्ना गरिरहेको छ । भर्नाका लागि करिब २ सय विद्यार्थीले आवेदन दिएको जीवन ज्योति माविका प्रधानाध्यापक तथा प्रबन्धक निर्देशक जोमन जेम्सले जानकारी दिए ।

कोहलपुरका विद्यार्थीहरू गुणस्तरीय शिक्षाका लागि काठमाडौँ धाउनुपर्ने बाध्यता अन्त्य गर्न विद्यालयले कम खर्चमै साइन्स र म्यानेजमेन्टका कक्षा सञ्चालन गर्ने तयारी गरेको प्रधानाध्यापक जेम्सले दाबी गरे । विद्यालयप्रति अभिभावकको भरोसा र विश्वास रहेकाले विद्यार्थी खोज्नुपर्ने अवस्था नरहेको उनले बताए ।

‘शैक्षिक गुणस्तर प्रदान गर्नुपर्छ,’ उनले भने, ‘विद्यार्थीहरूको कमी हुँदैन, विद्यार्थी र अभिभावक आफैँ विद्यालय खोज्दै आउने गर्छन् ।’ अहिले साइन्स र म्यानेजमेन्टका लागि विद्यालयमा भौतिक र दक्ष जनशक्तिको सम्पूर्ण तयारी रहेको उनको भनाइ छ ।

साउन पहिलो साताबाट पठनपाठन सुरु हुने शिक्षक चेत चापागाईंले जानकारी दिए । उनका अनुसार पश्चिम क्षेत्रमा पहिलो पटक सुविधा सम्पन्न अत्याधुनिक ल्याबहरूसहित विद्यालयले साइन्स र म्यानेजमेन्टका कक्षा सञ्चालन गर्न लागेको हो ।

साइन्स र म्यानेजमेन्टका विद्यार्थीहरूका लागि फिजिक्स, क्यामेस्ट्री, बायोलोजी र कम्प्युटरका छुट्टाछुट्टै ल्याबहरू तयारी अवस्थामा रहेको उनले बताए । हिजोदेखि आवेदनको म्याद सकिएकाले आजदेखि प्रवेश परीक्षा सञ्चानल हुने र उत्तीर्ण विद्यार्थीहरूलाई अन्तर्वार्तापश्चात भर्ना गरिने उनले जानकारी दिए ।

अहिले जीवन ज्योतिमा विद्यालयमा कक्षा–१० सम्म २ हजार २ सय विद्यार्थी अध्ययनरत छन् । विद्यालयले दक्ष जनशक्तिबाट पठनपाठन गरिरहेको दाबी गरेको छ । विद्यालयले पहिलो ब्याचमै २०८० को एसइई परीक्षामा ४१ जना विद्यार्थी सहभागी गराएकोे विद्यालयले शतप्रतिशत नतिजा ल्याउन सफल भएको छ ।

एसइईमा सहभागी ४१ जना विद्यार्थीमध्ये २७ जना ए र १४ जना ए प्लस ल्याएर उत्तीर्ण भएका हुन् । पहिलो ब्याचका विद्यार्थीहरूले नै ए र ए प्लससहित शतप्रतिशत नतिजा ल्याउनुमा शिक्षक र विद्यार्थीहरूको अथाह मेहेनत र परिश्रम रहेको प्रधानाध्यापक जेम्सले बताए । ‘रातदिन नभनी विद्यार्थीहरूलाई अध्यापन गराउँदा मात्र परिणाम सोचेभन्दा राम्रो ल्याउन सफल भइएको हो,’ उनले भने ।

प्रकाशित मितिः सोमवार, असार २५, २०८१     12:01:23 PM  |