कोहलपुर ।
बाँकेको कोहलपुर नगरपालिका, ११ दशविगाह नजिक एम्बुलेन्स र मोटरसाइकल दुर्घटना हुँदा महिलाको मृत्यु भएको छ भने एक पुरुष गम्भिर घाइते भएका छन् ।
नेपालगञ्ज मेडिकल कलेज शिक्षण अस्पताल कोहलपुरबाट नेपालगञ्जतर्फ जाँदै गरेको भे १ च ८२४ नम्बरको एम्बुलेन्स र दक्षिणबाट उत्तरतर्फ भइरहेको से ५ प ४८४ नम्बरको मोटरसाइकल ठोक्किदा उक्त दुर्घटना भएको कोहलपुर प्रहरीले जनाएको छ ।
जिल्ला ट्राफिक कार्यालय बाँके कोहलपुरका अनुसार मृत्यु हुनेमा मोटरसाइकल पछाडी बसेकी कालिकोट सान्नि त्रिवेणी गाउँपालिका ९ घर भएकी २८ वर्षिया शोभा बटाला रहेकी छिन् ।
उनी बैजनाथ गाँउपालिका स्थित बनकटुवा प्राथमिक स्वास्थ्य केन्द्रमा अनमीको रुपमा कार्यरत रहेको बैजनाथ गाउँपालिकाका स्वास्थ्य शाखा प्रमुख घननाथ योगीले जानकारी दिए । उनका अनुसार उनी ड्युटीमा आउँदै गर्दा दुर्घटनामा परेकी हुन् ।
मोटरसाइकल चालक ५२ वर्षिय दण्डविक्रम विष्ट गम्भिर घाइते भएको इलाका प्रहरी कार्यालय कोहलपुरले जनाएको छ । उनको नेपालगञ्ज मेडिकल कलेज शिक्षण अस्पताल कोहलपुरमा उपचार भइरहेको छ ।
सामान्य घाइते भएका एम्बुलेन्स चालक बारबर्दिया नगरपालिका ६ बर्दियाका राम बहादुर थारुलाई प्रहरीले नियन्त्रणमा लिएको छ ।
प्रतिक्रिया दिनुहोस्