काठमाडौँ ।
एलजी इलेक्ट्रोनिक्सले कोरियाको बुसानमा अप्रिल ७ देखि १० सम्म आयोजना गरेको ‘एलजी इनोफेस्ट २०२६ एपीएसी’मा नवीनतम उत्पादन तथा क्षेत्र विशेष समाधान प्रदर्शन गरेको छ । यो कार्यक्रम कम्पनीको २०२६ इनोफेस्ट शृंखलाको भव्य समापनका रूपमा आयोजना गरिएको हो । जसमा एसिया–प्रशान्त क्षेत्रका करिब २० देशबाट २०० भन्दा बढी प्रमुख साझेदार तथा सञ्चारकर्मीको सहभागिता रहेको छ ।
‘नवप्रवर्तनसँगै अगाडि’ भन्ने मूल नारासहित आयोजित कार्यक्रममा एलजीले एसियाली उपभोक्ताको जीवनशैलीलाई केन्द्रमा राख्दै विकास गरिएका नवीनतम प्रविधि र समाधानको विस्तृत झलक प्रस्तुत गरेको जनाइएको छ । सांस्कृतिक रूपमा साझा तत्त्वहरूलाई समेट्दै कम्पनीले आफ्नो के–टेक नवप्रवर्तनमार्फत स्थानीय आवश्यकताअनुसार व्यावहारिक गृह समाधान उपलब्ध गराउने रणनीति देखाएको छ ।
एलजीले कपडा धुने उपकरणअन्तर्गत वास टावर शृंखला विस्तार गर्दै २५ इन्चको नयाँ मोडेल सार्वजनिक गरेको छ । जुन एसियाली घरहरूको संरचना र सीमित स्थानलाई ध्यानमा राखेर तयार गरिएको हो । यसअघि उपलब्ध २४ र २७ इन्चका मोडेल समेत समावेश यस शृंखलाले स्थानको अधिकतम उपयोग र दैनिक प्रयोगमा सहजता प्रदान गर्ने लक्ष्य राखेको छ ।
नयाँ टप–लोड वाशरमा कृत्रिम बुद्धिमत्ता आधारित प्रत्यक्ष ड्राइभ प्रविधि प्रयोग गरिएको छ । यसले कपडाको प्रकार र मैलोपनको स्तरअनुसार धुने प्रक्रिया स्वतः समायोजन गर्छ । टर्बो वास त्रि–आयामिक प्रविधिले ३० मिनेटभन्दा कम समयमा पूर्ण धुने चक्र पूरा गर्ने क्षमता राख्छ । साथै स्वचालित डिस्पेन्सरले आवश्यक मात्रामा डिटर्जेन्ट वितरण गर्ने सुविधा उपलब्ध गराउँछ ।
एलजी वास कम्बो उपकरणले एउटै युनिटमा धुने र सुकाउने दुवै सुविधा प्रदान गर्दै ऊर्जा दक्षता र कार्यक्षमता बढाएको छ । इन्भर्टर हीट पम्प प्रविधिमा आधारित यस प्रणालीले एसियाली उपभोक्ताको विद्युत् खर्चप्रतिको संवेदनशीलतालाई ध्यानमा राख्दै प्रभावकारी सुकाउने समाधान उपलब्ध गराउने कम्पनीको दाबी छ ।
व्यावसायिक प्रयोगका लागि एलजीले उच्च क्षमताका लन्ड्री समाधान पनि प्रस्तुत गरेको छ । कस्टम कार्यक्रम, खुला एपीआई जडान तथा सहज मर्मत डिजाइनजस्ता विशेषतासहित कम्पनीले चाँडै धुने र सुकाउने संयुक्त व्यावसायिक मोडेल विश्व बजारमा विस्तार गर्ने योजना बनाएको जनाएको छ ।
भान्सा समाधानतर्फ एलजीले नयाँ फ्रिज डिजाइन सार्वजनिक गरेको छ । जसमा ‘फिट एण्ड म्याक्स’ अवधारणाअन्तर्गत शून्य क्लियरन्स हिन्ज प्रयोग गरिएको छ । यसले भित्तासँग पूर्ण रूपमा मिल्ने संरचना प्रदान गर्दै सानो स्थानमा पनि भण्डारण क्षमता अधिकतम बनाउँछ । उन्नत बरफ प्रणालीले विभिन्न चार प्रकारका बरफ विकल्प उपलब्ध गराउने सुविधा पनि समावेश गरिएको छ ।
प्रतिक्रिया दिनुहोस्