वीरेन्द्रनगर ।
कर्णाली प्रदेशमा २१ महिनाभित्र ६५ पुल निर्माण भएका छन् । आर्थिक वर्ष २०८०÷८१ देखि हालसम्मका २१ महिनाको अवधिमा कर्णाली प्रदेशभरी ६५ पुल निर्माण भएका हुन् । प्रदेश सरकारको भौतिक पूर्वाधार तथा सहरी विकास मन्त्रालयले दिएको विवरणअनुसार २३ पक्की पुल तथा ४२ झोलुङ्गे पुल निर्माण भएका छन् । तथ्यांक अनुसार चालू आर्थिक वर्षको साउनदेखि पुससम्म ६ वटा झोलुङ्गे पुल निर्माण भएका छन् ।
५ वटा सडकमा पुल (मोटरेबल) निर्माण भएको पूर्वाधार तथा सहरी विकास मन्त्रालयका प्रवक्ता रमेश सुवेदीले जानकारी दिए । उनका अनुसार हुम्लामा ४ र कालीकोटमा २ झोलुङ्गे पुल निर्माण भएका छन् । त्यस्तै सुर्खेतमा १, जाजरकोटमा १, कालीकोटमा १, मुगुमा १ र सल्यानमा १ मोटरेबल पुल निर्माण भएका हुन् । चालु आवमै २१ दशमलव ४५ किलोमिटर सडक कालोपत्र गरिएको छ । यो अवधिमा ९५ किलोमिटर कालोपत्र गरिएको मन्त्रालयले जनाएको छ । भने २०५ किलोमिटर ग्राभेल र ५२५ कच्ची सडक कटानको काम भएको छ ।
आर्थिक वर्ष २०८१÷८२ का लागि बहुवर्षे ठेक्का हुने गरेर ८ वटा नयाँ मोटरेबल पुल निर्माणका लागि स्वीकृति दिइएको छ । त्यस्तै १ बेलिब्रिज पुल निर्माण गर्नका लागि सहमति प्रदान गरिएको छ । १४० वटा नयाँ झोलुङ्गे पुल निर्माण गर्नका लागि स्रोत सुनिश्चित गरेर बहुवर्षे ठेक्काको काम सुरु भएको छ । रुकुम–पश्चिममा ५ योजनामध्ये १ सडक, २ पुल र २ झोलुङ्गे पुल मात्र स्रोत सुनिश्चित गरिएको छ । जाजरकोटका ३ बेलिब्रिज पुलका लागि स्रोत सुनिश्चित भई काम सुरु गरे पनि बारेकोट र नलगाड नगरपालिकाको बीचमा रहेको खारामा नलगाड जलविद्युत् आयोजनाले पनि पुल निर्माण गरिरहेकाले सो ठाउँमा अहिले तत्काल पुलको काम रोखिएको छ ।
११ योजना सुर्खेतमा स्रोत सुनिश्चित गरिएको छ । त्यसमध्ये ४ झोलुङ्गे पुल, ४ सडक, २ सडक तथा पुल र अन्य संरचना १ रहेको छ । दैलेखमा २ मोटरेबल पुल, ८ झोलुङ्गे पुलको लागि बजेट सुनिश्चित गरिएको छ । मुगुमा ६ वटा योजनाको मात्र स्रोत सुरक्षित गरिएको छ । हुम्लामा ३, डोल्पामा ८, जाजरकोटमा ४, कालीकोटमा ३, दैलेखमा ८, सल्यानमा ७ र जुम्लामा ४ योजनाको बजेट सुनिश्चित गरिएको छ । कर्णाली ६१ योजनाको स्रोत सुरक्षित गरिएको मन्त्रालयका प्रवक्ता सुवेदीले जानकारी दिए ।
चालू आर्थिक वर्षमा ग्रामीण सडक सञ्जाल सुधार आयोजनाअन्तर्गत सुर्खेतको दशरथपुर–जितेजुवा–ढाँडखेत–मटेला–धरमपोखरा सडक, जाजरकोटको पश्चिम क्षेत्रमा रहेको शिवालय गाउँपालिकाको मोर्क हुँदै छेडागाड नगरपालिकाको चक्ष्लिा–बडावन–जुनिचाँदेको सानाखोलाको काम सुरु भएको छ । रुकुम–पश्चिमको चौरजहारी नगरपालिकाको नार्जी–खोलागाउँ–चौखा–बैरागीठाँटी, मुसीकोट–सल्ले सडकको कालोपत्रको काम सुरु गरिएको उनले जानकारी दिए ।
प्रादेशिक तथा स्थानीय सडक सुधार आयोजनाअन्तर्गत दैलेखको डुङ्गेश्वर–डाँडापराजुल सडक स्तरोन्नति तथा दैलेखको सम्झौताको काम पूरा भएर काम सुरु हुन लागेको छ । गल्फागाड–थालाकाटे सडक स्नरोन्नतिको कामसमेत सुरु भएको छ । राष्ट्रिय खेलकुद प्रतियोगितालाई लक्षित गरी वीरेन्द्रनगरस्थित रङ्गशाला वरिपरि, सुर्खेत विमानस्थल जोड्नेलगायतका सडक कालोपत्र गर्ने काम पूरा भएको उनले जानकारी दिए ।
हुम्लाको खार्पु–सिमकोट नमुना एकीकृत पूर्वाधार विकास कार्यक्रम तथा डोल्पाको शे–फोक्सुण्डो गाउँपालिकाको रिङ्बो बस्ती विकास कार्यक्रमको सम्झौता हुने चरणमा रहेको जानकारी गराइएको छ । प्रादेशिक सडक गुरुयोजना अद्यावधिक गरी स्वीकृतिको अन्तिम चरणमा रहेको जनाइएको छ । सुस्त गतिमा काम गरिरहेका करिब ३५ सडक तथा पुल आयोजनाको हाल दुई तिहाइ आयोजनामा प्रगति सन्तोषजनक रूपमा अघि बढेको मन्त्रालयको दाबी छ ।
यस्तै भूकम्प प्रभावित जाजरकोट, रूकुम पश्चिम र सल्यानका क्षति भएका सार्वजनिक विद्यालय तथा स्वास्थ्य संस्थाहरूको पुनर्निर्माणका लागि कूल ५० करोड विनियोजन भई ६२ विद्यालय र १८ स्वास्थ्यचौकी गरी कूल ८० संस्थाहरूको पुनर्निर्माणको काम सुरु गरिएको मन्त्रालयले जनाएको छ ।
प्रतिक्रिया दिनुहोस्