कोहलपुर (बाँके) ।
सामाजिक सञ्जाल ह्वाट्सएपमा आफू लरेन्स बिस्नोइ र अनमोल बिस्नोइ हुँ भन्दै फिरौती माग्ने एकजना पक्राउ परेका छन् । विदेशी नम्बरको ह्वाट्सएप खोली म्यासेजमा भारु ५ करोड (नेरु ८ करोड) मागेको र नदिए जे पनि हुन सक्ने भन्दै धम्क्याउने एकजना कोहलपुरबाट पक्राउ परेका हुन् । इलाका प्रहरी कार्यालय कोहलपुर बाँकेका अनुसार फिरौती मागेको आरोपमा पक्राउ पर्नेमा सुर्खेतको भेरी नगरपालिका वडा नम्बर ७ कोठघारी घर भइ हाल बाँकेको कोहलपुर–५ मा कोठा भाडामा बस्दै आएका ४१ वर्षीय रामबहादुर बुढाक्षेत्री रहेका छन् ।
प्रारम्भिक अनुसन्धानको क्रममा बुढाक्षेत्रीले प्रयोग गर्ने मोबाइलसमेत बरामद गरेर हेर्दा विदेशी नम्बर ह्वाट्सएप खोलेको र म्यासेज गरेको देखिएको र अन्य थप अनुसन्धान भइरहेको इलाका प्रहरी कार्यालय कोहलपुरका प्रहरी निरीक्षक हरि भट्टराईले जानकारी दिए । प्रहरी निरीक्षक भट्टराईका अनुसार उनले आफूलाई भारतीय ग्याङ्स्टर लरेन्स बिस्नोई र अनमोल बिस्नोई बताउँदै ह्वाट्सएपबाट धम्की दिएका थिए । लरेन्स बिस्नोई एक भारतीय ग्याङ्स्टर हुन्, जो सन् २०१४ देखि फिरौती र हत्या आरोपमा भारतीय कारागारमा छन् ।
उनमाथि पञ्जाबी गायक सिद्दु मुसेवालाको हत्या (२९ मे २०२२), अभिनेता सलमान खानलाई ज्यान मार्ने प्रयास र बाबा सिद्दीकीको हत्या जस्ता आरोप छन् । उनका भाई अनमोल बिस्नोईले लरेन्स जेलमा रहेको समयमा व्यापारी र उद्योगीहरूलाई धम्की दिँदै फिरौती माग्ने गरेको कोहलपुर प्रहरीले जनाएको छ ।
उनीमाथि थप अनुसन्धान भइरहेको प्रहरी निरीक्षक भट्टराईले जानकारी दिए । प्रहरीका अनुसार उनी २०५९ सालमा जागिर छाडेर भागेका नेपाली आर्मीका भगौडा हुन् । आर्मीबाट भागेपछि उनी विभिन्न नामले आपराधिक समूहमा लागेर अपराधको गतिविधि गर्दै आएको प्रहरीको भनाइ छ ।
पक्राउ परेका ४१ वर्षीय बुढाक्षेत्रीमाथि पनि विगतमा विभिन्न मुद्दा लागेको उनले बताए । प्रहरी निरीक्षक भट्टराईले निज बुढाक्षेत्रीलाई २०६१ साउन २७ मा काँकटभिट्टा झापाबाट नेपाली युवतीलाई ललाइफकाई भारत लैजाने र जिउ मास्ने–बेच्ने उद्योगमा मुद्दा लागेको बताए । यसैगरी २०६२ चैत ८ मा झापा प्रहरीले उनलाई धम्की दिई चन्दा असुली गरेको मुद्दामा पक्राउ गरेको थियो ।
यस्तै महानगरीय प्रहरी परिसर काठमाडौँबाट २०६४ भदौ ९ मा धम्की दिई मानिसलाई नियन्त्रणमा लिई ट्याक्सीमा राखेर फिरौती असुलेको आरोप उनीमाथि लागेको छ । उनी इलाका प्रहरी कार्यालय छिन्चु सुर्खेतबाट २०६४ चैत २७ मा संविधान सभा निर्वाचनका उम्मेदवार ऋषि शर्मालाई सुर्खेतको लोधे भन्ने स्थानमा गोली हानी मारेको कर्तव्य ज्यान मुद्दा लागेका व्यक्ति समेत हुन् । उनीमाथि २०६५ चैतमा द्वन्द्वपीडित सेना–प्रहरीको आन्दोलनमा हतियार खोसेको मुद्दा लागेको इलाका प्रहरी कार्यालय कोहलपुरले जनाएको छ ।
३२ वर्षदेखि फरार अपराधी पक्राउ
जिल्ला प्रहरी कार्यालय बाँके प्रहरीले ३२ वर्षदेखि फरार कर्तव्य ज्यान मुद्दाका एक दोषीलाई पक्राउ गरेको छ । पक्राउ पर्नेमा नेपालगन्ज उपमहानगरपालिका– २० राँझा बस्ने ६२ वर्षीय सन्तोष अहिर रहेका जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक (डीएसपी) दीपक पातलीले जानकारी दिए ।
अहिरलाई बाँके जिल्ला अदालतले २०४९ साल वैशाख १८ गते २ वर्ष कैद तोकेको थियो । त्यसयता फरार रहँदै आएका उनलाई मंगलबार पक्राउ गरी बाँके जिल्ला अदालतमा बुझाइएको जिल्ला प्रहरी कार्यालय बाँकेले जनाएको छ ।
उनीलाई मंगलबार नै अदालतको आदेशले कैद भुक्तानीका लागि नेपालगन्ज कारागारमा चलान गरिएको छ । जिल्ला प्रहरी कार्यालय बाँकेबाट खटिएको प्रहरी टोलीले घरमै लुकिछिपी बसिरहेको अवस्थामा अहिरलाई पक्राउ गरेको थियो ।
प्रतिक्रिया दिनुहोस्