नेपालगन्ज ।
विद्युत प्राधिकरण नेपालगन्ज वितरण केन्द्रबाट विद्युत बक्यौता रहेका ग्राहकको लाइन काट्न खटिएका कर्मचारीहरूलाई कुटपिट गर्ने तीन जनामाथि आपराधिक उपद्रवमा मुद्दा दर्ता भएको छ । जिल्ला प्रहरी कार्यालय बाँके प्रहरीका अनुसार पीडित कर्मचारीका तर्फबाट नेपालगन्ज वडा नम्बर ३ का चाँदबाबु अन्सारी, आल्तमस अन्सारी र निजामुद्धिन अन्सारीमाथि आपराधिक उपद्रवमा मुद्दा दर्ता भएको हो ।
मुद्दा दर्ता भएकाहरूमाथि अनुसन्धान अघि बढाइएको जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक (डीएसपी) दीपक पातलीले जानकारी दिए । मंगलबार नेपालगन्ज वडा नम्बर ३ एकलैनीमा एउटा घरमा लाइन काटेर फर्किने क्रममा स्थानीयहरूले गरेको कुटपिटबाट पाँच जना कर्मचारीहरू घाइते भएका थिए । नेपालगन्ज वितरण केन्दका प्रमुख जगन्नाथ लामिछानेले कानुन व्यवसायीसँगको परामर्शपछि कुटपिट गर्नेहरूमाथि आपराधिक उपद्रवमा मुद्दा दर्ता गरिएको जानकारी दिए ।
गम्भीर घाइते भएका मटर रिडर उदयराज यादवबाहेक अरु कर्मचारीहरू भने अस्पतालबाट डिस्चार्ज भइसकेका लामिछानेले मिसन टुडेलाई बताए । उनका अनुसार यादवको सिटीस्क्यान रिपोर्टमा घाँटीको नशामा चोट लागेको पाइएको छ । एक्स रे रिपोर्टबाट हात मर्किएको पुष्टि भएको छ । यादवसहित मिटर रिडिङ सुपरभाइजर लोकेन्द्र शाही, मिटररिडरहरू सतराम यादव, देशराज यादव र सन्तराम यादव घाइते भएका थिए ।
६० दिनभन्दा बढी समयदेखि बिल बक्यौता रहेको नेपालगन्ज वडा नम्बर ३ एकलैनीस्थित एक ग्राहकको लाइन काट्न खटिएको टोलीमाथि अचानक ढुंगा, लठ्ठी र लातमुक्काले कुटपिट भएको कर्मचारीहरूको भनाइ छ । बाँकेका प्रमुख जिल्ला अधिकारी धर्मराज जोशीले कर्मचारीमाथि कुटपिटको घटनालाई गम्भीरतापूर्वक लिइएको बताए । घटनाको गम्भीर अनुसन्धान गरी दोषीलाई कारबाहीको दायरामा ल्याइने उनले बताएका छन् ।
मुद्दा दायर गरिएको कसुरलाई पहिले अभद्र व्यवहार शब्दावली प्रयोग गर्ने गरिएकोमा २०७४ मा मुलुकी फौजदारी अपराध संंहिता जारी भएपछि आपराधिक उपद्रव भन्ने गरिन्छ । जसको छिनोफानो प्रमुख जिल्ला अधिकारीले गर्ने व्यवस्था रहेको छ । संहिताको दफा २८५ को (ङ) मा आपराधिक उपद्रव गरेको कारणले कसैलाई कुनै हानी नोक्सानी भएकोमा तीन वर्षसम्म कैद र तीस हजार रूपैयाँसम्म जरिवाना हुने व्यवस्था छ ।
प्रतिक्रिया दिनुहोस्