कैलाली ।
कैलालीको धनगढी उपमहानगरपालिका वडा नम्बर ३ स्थित आन्तरिक राजस्व कार्यालयदेखि मित्रनगर हुँदै रिङगरोड जोड्ने सडक अहिलेसम्म बन्न सकेको छैन् । धनगढी ३ को सबैभन्दा बढी चहलपहल हुने सो सडक नबन्दा स्थानीयहरूले समस्या भोग्नु परिरहेको छ ।
स्थानीय हरिदत्त रिजालले बडहरा र मित्रनगरको सडक नबनेको बताए । उनले भने, ‘सडक बनाउने सुनिश्चितता हुनुपर्छ । चाँडोभन्दा चाँडो सडक बनोस् । जनप्रतिनिधिहरूले बन्छ बन्छ भन्दै आश्वासनमात्र दिइरहेका छन् ।’
स्थानीय विकास स्वाँरले वडाका सबैभन्दा डुबान हुने सडक रहेको बताउँदै भने, ‘सडक बनेको भए डुबानबाट पनि मुक्ति पाइन्थ्यो होला ।’ अर्का स्थानीय जयबहादुर चन्दले हरेक वर्षातमा सो सडकमा हिँड्न नमिल्ने गरेको बताउँदै भने, ‘धनगढीमा धेरै बाटो बन्दै गएका छन् । तर, यो सडक प्राथमिकतामा पर्न सकेको छैन् ।’
विद्यालय, स्वास्थ्य चौकी, वडा कार्यालय जान पनि सो सडक प्रयोग हुँदै आएको छ । तर, सडक बनाउनतर्फ कसैले ध्यान नदिएको वडाबासीहरू बताउँछन । स्थानीय मेनुका खड्काले सबैभन्दा बढी व्यस्त हुने सडक नबन्दा हिँडडुल गर्न समस्या भइरहेको बताइन् । उनले वडाका प्रतिनिधिहरूले पनि सो सडक बनाउनतर्फ ध्यान दिनुपर्ने बताइन् ।
वडा नम्बर ३ का वडा अध्यक्ष राजबहादुर ऐरले प्रदेश सरकारले बजेटको सुनिश्चितता गर्न नसक्दा सो सडक बन्न नसकेको बताए । उनले प्रदेश पूर्वाधार कार्यालयले बहुवर्षीय आयोजनाका रूपमा आर्थिक मामिला मन्त्रालयमा पठाएको बताउँदै भने, ‘मन्त्रालयमा फाइल गएको छ । बजेटको सुनिश्चितता नहुँदा बहुवर्षीय आयोजनामा पर्न सकेको छैन् ।’
प्रतिक्रिया दिनुहोस्