भोजपुर ।
उत्तरी क्षेत्रबाट भोजपुर र संखुवासभालाई जोड्ने अरुण नदीको लम्सुवाघाटमा निर्माण भइरहेको पक्की पुल १४ वर्षबाट अलपत्र छ । करिब ४ करोड रूपैयाँ खर्च भएपछि यो पुल निर्माण अलपत्र बनेको हो । लम्सुवाघाटमा विसं २०६७ सालबाट पुल निर्माण थालिएको थियो । ६ पिलरको बेस राखेपछि यहाँको पुल निर्माण अलपत्र बनेको षडानन्द ६ का वडाध्यक्ष सुमन विसुन्केले बताए ।
‘पुल निर्माणको काम १४ वर्षबाट अलपत्र छ,’ वडाध्यक्ष विसुन्केले भने, ‘राज्यको करिब ४ करोड रूपैयाँ खर्चपछि काम अलपत्र पारिएको अवस्था छ । यो पुल बनिदिए स्थानीयबासीलाई राहत हुने थियो ।’
यहाँ एक सय ७२ मिटर लामो पक्की पुल निर्माणका लागि काम थालिएको थियो । निर्माणको क्रममा नै अलपत्र बनेको पुल सम्पन्न गराउन राज्यले ध्यान दिनुपर्ने षडानन्द ६ का स्थानीयबासी सीताराम लम्सालले बताए । पक्की पुल नहँुदा आवतजावतमा समस्या रहेको उनको भनाइ छ ।
निर्माण कम्पनीले २०६७ सालदेखि पुल निर्माण सुरु गरेको थियो । सम्झौता अनुसार पुल २०७० सालमा सक्नुपर्ने थियो । तर निर्माण कम्पनीले काममा ढिलाइ गरेपछि राज्यको तर्फबाट ठेक्का रद्द गरिएको सडक डिभिजन कार्यालय तुम्लिङटार प्रमुख शुभाञ्जन दाहालले जानकारी दिए ।
विसं २०७८ मा ठेक्का रद्द प्रक्रियामा गएपछि निर्माण कम्पनीले हालेको मुद्दा कार्यालयको पक्षमा फैसला भएको उनको भनाइ छ । फैसलापछि पनि निर्माण कम्पनीले क्षतिपूर्तिको माग गर्दै पुनः अदालतमा रिट दायर गरेको र अदालतले उक्त रिट सदर गरेकाले तीन सदस्य मध्यस्तकर्तामार्फत समस्या समाधन प्रक्रियामा रहेको उनले जानकारी दिए ।
‘काम नभएपछि राज्यको तर्फबाट ठेक्का रद्द गरिएको अवस्था हो,’ प्रमुख दाहालले भने, ‘उक्त विषयमा निर्माण कम्पनीले मुद्दा हालेको अवस्था थियो । दुवैै मुद्दा कार्यालयको पक्ष फैसला भएको छ । पुनः निर्माण कम्पनीले क्षतिपूर्तिको माग गर्दै रिट हाल्यो । उक्त रिट अदालतले सदर गरेको छ । त्यसको नजिता आएपछि मात्र थप प्रक्रिया अघि बढ्छ ।’ अहिले कम्पनीको धरौटी बापतको ७७ लाख रकम रोक्का रहेको उनले जानकारी दिए ।
प्रतिक्रिया दिनुहोस्