‘उद्योगधन्दा बन्द गर्न र देशलाई टाट पल्टाउन दिइँदैन’

विराटनगर ।

प्रधानमन्त्री केपी शर्मा ओलीले मन्त्रिपरिषद्को निर्णय कार्यान्वयन गर्न आनाकानी गरे विद्युत प्राधिकरणका कार्यकारी निर्देशक कुलमान घिसिङप्रति कडा कदम चलाउने संकेत गरेका छन् । सोमबार विराटनगरमा सञ्चारकर्मीसँग कुराकानी गर्दै ओलीले यस्तो संकेत गरेका हुन् ।

उद्योगहरूमा लाइन जोड्न सरकारले दिएको निर्देशन कुलमानले आनाकानी गरेकोबारे प्रधानमन्त्रीलाई सञ्चारकर्मीले प्रश्न गरेका थिए । विद्युत लाइन आज पनि जोडिएन नि ? भन्ने प्रश्नको जबाफ दिँदै प्रधानमन्त्री ओलीले भने, ‘जोडिएन हैन ? ठिक छ त्यो हेर्दै जानुपर्छ । तर, देश बिगार्न र उद्योगधन्दा बन्द गर्न, देशलाई टाट पल्टाउन चाहिँ दिइँदैन ।’

यसअघि सरकारका प्रवक्ता सञ्चार तथा सूचना प्रविधि मन्त्री पृथ्वीसुब्बा गुरूङले पनि सरकारको निर्णय कार्यान्वयन नगर्ने कुरा क्षम्य नहुने बताएका थिए । प्रधानमन्त्रीले पनि ‘देश बिगार्न र टाट पल्टाउन नदिने’ बताएर सरकारी योजनाबारे संकेत गरेका हुन् ।

सरकारले २४ घण्टाभित्र सबै उद्योगमा लाइन जोड्ने निर्देशन प्राधिकरणलाई दिएसँगै सोमबार संयुक्त प्रेस विज्ञप्ति जारी गर्दै नेपाल विद्युत प्राधिकरण कर्मचारी कल्याण परिषद र राष्ट्रिय कर्मचारी युनियनले ध्यानाकर्षण गराएका थिए ।

डेडिकेटेड र ट्रंकलाइन विवादमा उद्योगको लाइन जोडेर बक्यौता उठाउने निर्णय मन्त्रिपरिषदले गरे पनि नेपाल विद्युत प्राधिकरणले कुनै निर्णय लिन सकेको छैन । अर्को प्रसंगमा प्रधानमन्त्रीले सरकार बाहिर रहँदा माओवादीले सधैं गर्ने भनेकै आन्दोलन भएको पनि बताए ।

‘सरकारमा नभएपछि उहाँहरू यस्तै हो,’ उनले भने, ‘अबको १ वर्ष ८ महिनापछि म हट्छु । त्यसपछि शेरबहादुरजी प्रधानमन्त्री बन्नुहुन्छ । उहाँले चुनाव गराउनुहुन्छ । चुनावको नतिजा जे आउँछ, त्यही अनुसार हुन्छ ।’