धामपुरमा फेरी दुई मोटरसाइकल ठोक्किँदा एकको मृत्यु

बाँके ।

नेपालगन्ज अगैया सडक खण्डको राप्ती सोनारी–४ बैजापुरमा मोटरसाइकल दुर्घटनामा एक जनाको मृत्यु भएको छ भने एक जना गम्भीर घाइते भएका छन् । बिहीबार दुई मोटरसाइकल ठोक्किँदा एक जनाको मृत्यु भएको जिल्ला प्रहरी कार्यालय बाँकेले जनाएको छ ।

मृत्यु हुनेमा नेपालगन्ज उपमहानगरपालिका–१९ आलिनगरका ३९ वर्षीय लोकबहादुर वंशीमगर रहेका छन् । राप्तीसोनारी गाउँपालिका–६ छटकपुर बस्ने २९ वर्षीय राधेश्याम थारू गम्भीर घाइते भएको प्रहरीले जनाएको छ ।

उनको नेपालगन्ज मेडिकल कलेज शिक्षण अस्पताल नेपालगन्जमा उपचार भइरहेको छ । मृतक र घाइते दुबै जना मोटरसाइकल चालक रहेका छन् । बिहीबार दुर्घटना भएको नजिकै केही दिन अघिमात्र दुई मोटरसाइकल ठोक्किँदा तीन जनाको मृत्यु भएको थियो भने दुई जना गम्भीर घाइते भएका थिए ।