16 July 2024  |   मङ्लबार, साउन १, २०८१

कोहलपुरमा बाढी र डुबानको समस्या बढ्ने पूर्वानुमान

मिसनटुडे संवाददाता
प्रकाशित मितिः मङ्लबार, असार २६, २०८१  

कोहलपुर नगरपालिकाको नगर विपद् व्यवस्थापन समितिले तयार पारेको ‘मनसुन पूर्वतयारी तथा प्रतिकार्य योजना २०८१’ मा यस वर्ष वर्षा बढी भएकाले बाढी र डुबानबाट नगरपालिकामा धेरै परिवार उच्च जोखिममा रहेको प्रक्षेपण गरिएको छ ।

बाँके ।

कोहलपुर नगरपालिकाले यस वर्ष बाढी र डुबानबाट नगर क्षेत्रभित्र १३ हजार ६ सय ३० व्यक्ति प्रभावित हुने प्रक्षेपण गरेको छ । यस वर्ष वर्षा बढी हुने अनुमानका आधारमा बाढी र डुबानबाट नगरपालिकामा १५ वडाका ३ हजार घरधुरीका १३ हजार ६ सय ३० व्यक्ति उच्च जोखिममा रहेको प्रक्षेपण गरिएको हो ।

जल तथा मौसम विज्ञान विभाग मौसम पूर्वानुमान महाशाखाले यस वर्ष बढी वर्षाको सम्भावना रहेको आँकलन गरेको छ । लुम्बिनी प्रदेशमा यस वर्ष ३५ देखि ४५ प्रतिशतसम्म वर्षा हुनसक्ने महाशाखाको अनुमान छ ।

त्यसैका आधारमा कोहलपुर नगरपालिकाले विगतका तुलनामा यस वर्ष नगरभित्र बाढी र डुबानको समस्या बढ््न सक्ने अनुमान गरेको हो । कोहलपुर नगरपालिकाको नगर विपद् व्यवस्थापन समितिले तयार पारेको ‘मनसुन पूर्वतयारी तथा प्रतिकार्य योजना २०८१’ मा यस वर्ष वर्षा बढी भएकाले बाढी र डुबानबाट नगरपालिकामा धेरै परिवार उच्च जोखिममा रहेको प्रक्षेपण गरिएको छ । कोहलपुर नगरपालिकाका प्रमुख पूर्णप्रसाद आचार्यको अध्यतामा आइतबार बसेको नगर विपद् व्यवस्थापन समितिको बैठकले ‘मनसुन पूर्वतयारी तथा प्रतिकार्य योजना २०८१’ पारित गरेको छ ।

प्रमुख आचार्यले अब सोही योजनाअनुसार क्षतिलाई न्यूनीकरण गर्दै जाने गरी तीव्र गतिमा काम गर्न विपद् व्यवस्थापन समितिलाई निर्देशन दिएको बताए । कोहलपुर विपद् व्यवस्थापन शाखा प्रमुख वीरबहादुर थापाले मनसुन पूर्वतयारी तथा प्रतिकार्य योजना पारित भएसँगै त्यसको कार्यान्वयन पनि सुरु भएको जनाए ।

उनका अनुसार समितिले यो बर्खायाममा बाढी र डुबानबाट नगरका १, ८, ९, १२, १३ र १४ नम्बर वडामा बाढी र डुबानको जोखिम देखिएको
छ । प्रतिकार्य योजनामा वडा नम्बर १२ मा १ हजार घरधुरीका ४ हजार २ जना प्रभावित हुने प्रक्षेपण गरिएको छ ।

थारूगाउँ, दीपज्योति टोल, शान्ति टोल, निबुवा, जानकी टोल, सुन्दरबस्ती, मसुरीखेत, रामजानकी टोल, रोहिणी, प्रगति टोल र स्कुल टोल जोखिममा रहेका छन् । यसैगरी, वडा नम्बर १३ का सिमरी, झोलुंगे पुलको दायाँबायाँ, भरैया, थारूगाउँ, खड्कवार, नेरामाविको उत्तरवस्ती गरी १ सय ७५ घरधुरीका ७ सय ४० व्यक्ति प्रभावित हुने अनुमान गरिएको छ ।

वडा नम्बर १४ मा हवल्दारपुर, गीतापुर, उढरापुर र रिहार गरी १ सय ६० घरधुरीका ८ सय परिवार जोखिममा छन् । वडा नं.८ का ८ सय घरधुरीका ३ हजार २ सय व्यक्ति जोखिममा छन् । सो वडाका मुन्नापुर, झर्कट्टी, पिपरीचोक टोल जोखिममा परेका छन् । वडा नं.९ का गणेश टोल, भेरी ग्यासको पूर्व तथा उत्तरका ३ सय ७५ घरधुरीका एक हजार १ सय ९५ परिवार प्रभावित हुने आँकलन छ । वडा नं. १ का सबै टोल जोखिममा रहेका छन् ।

सो वडाका १ सय ५० घरधुरीका ७ सय ५० परिवार प्रभावित हुने आँकलन गरिएको छ । यस्तै, वडा नम्बर १० मा एकता नगर, चटार गाउँ, रामनगर, जीवन ज्योति स्कुल आसपास, डुडुवा खोला आसपासका १ सय २० घरधुरीका ६ सय व्यक्ति प्रभावित हुने प्रक्षेपण गरिएको छ ।

नगरपालिका क्षेत्रको करिब ६० किलोमिटर क्षेत्रमा डुडुवाखोला, किरणनाला, सानो डुडुवानाला, इटानाला, रोहिणी खोला बग्ने गर्छन् । खासगरी डुडुवा खोला, डुडुवा नाला र किरणनालाले यसक्षेत्रका सर्वसाधारणलाई बाढी र डुबानको जोखिममा पार्ने गरेका छन् ।

प्रकाशित मितिः मङ्लबार, असार २६, २०८१     9:36:23 AM  |