17 April 2024  |   बुधबार, बैशाख ५, २०८१

आफ्नो मृत्युको खबरबारे के भन्छन् उदित नारायण ?

मिसनटुडे संवाददाता
प्रकाशित मितिः शुक्रबार, अशोज २१, २०७९  

बलिउडका चर्चित गायक उदित नारायणको हृदयघातको खबर सामाजिक सञ्जालमा भाइरल भइरहेको छ । यो खबर आएपछि उदितका फ्यानहरु निकै चिन्तित बनेका छन् । मानिसहरु उनको स्वास्थ्य कस्तो छ भन्ने जान्न चाहिरहेका छन् । यसअघि नै उदित नारायणका म्यानेजरले हृदयघातको खबरलाई अस्वीकार गरेका थिए ।

यता उदित नारायणले नै सञ्चारमाध्यमसँगको कुराकानीमा सो समाचार गलत भएको बताए । उनले भने-‘हार्ट अट्याकको खबर सरासर गलत हो, म धेरै हाँस्छु भने मलाई कसरी हार्ट अट्याक हुन्छ ?’

गायकले थप भने- ‘म हाँस्दै छु, दसैँको अवसरमा यस्ता नकारात्मक हल्लाले मेरो उमेर बढाएको छ । हिजो मात्र दिपालीले मलाई फोन गरेर भनिन्, तिम्रो लागि एउटा नराम्रो खबर छ, मानिसहरूले मलाई फोन गरेर, मेसेज गर्दै तिम्रो हृदयघातको बारेमा सोधिरहेका छन् ।’

उदित नारायणले धेरै पटक मानिसहरुका बारेमा यस्ता अफवाहहरु फैलिने गरेको बताउँदै यस्तो सुन्दा दु:ख लाग्ने बताए । उनले भने, ‘मैले बुझिनँ किन कसैले यस्तो गरेको होला।’

उदित नारायणका म्यानेजरले भने, ‘हामीलाई लाग्छ यो अफवाह नेपालबाट फैलिएको हो । किनभने जुन नम्बरबाट यो म्यासेज पठाइएको छ, त्यसको कोड नेपालको हो।’ यो अफवाहका कारण गायक आफैं पनि निकै दु:खी भएको म्यानेजरले बताए । उनका अनुसार उदित नारायण अहिले पूर्णरुपमा स्वस्थ छन् ।

प्रकाशित मितिः शुक्रबार, अशोज २१, २०७९     12:25:08 PM  |