सुदीप अधिकारी
बर्दिया, बैशाख १६
बर्दियाको भुरीगाउँ बजारस्थित जिजि ब्रदर्शले संचालन गरेको माइक्रोटिच कम्प्युटर एजुकेशन एण्ड इलेक्ट्रोनिक्स पसलबाट मोवाइल चोरेर भागेका २ युवा पक्राउ परेका छन् । चोरी भएको झण्डै तीन महिनापछि प्रहरीले चोरी भएका मोवाइल सहित उनीहरुलाई पक्राउ गरेको हो ।
दैलेख गोगनपानी– २ भित्री खोला घर भएका १८ वर्षीय शुरेन्द्र बंशी र कमल खत्रीलाई सामसुङ लगायत विभिन्न ब्राण्डका ७ वटा मोवाइल सेट र २ वटा ट्याव्लेट सहित दैलेखबाट पक्राउ गरिएको इलाका प्रहरी कार्यालय भुरिगाउँका प्रहरी निरिक्षक शंकरदत्त भट्टले बताए ।
पक्राउ परेका दुबै जनालाई ईलाका प्रहरी कार्यालय भुरीगाउँले बुधबार पत्रकार र स्थानिय व्यापारीको उपस्थितीमा सार्वजनिक गर्यो । चोरी भएका मोवाइलको आइएमई नम्बरको आधारबाट चोर पत्ता लागेको प्रहरीले जनायो ।
उनीहरुले चोरेको केही मोवाइल सुर्खेत विरेन्द्रनगरको एक पसलमा विक्री गरेको र केही मोवाईल गाउँमै बिक्री गरेका
थिए ।
पक्राउ परेका दुबै जनालाई जिल्ला प्रहरी कार्यालय गुलरिया पठाईएको छ । चोरी मुद्धामा बिगो र सोही बराबरको जरिवाना र तीन महिना सजाय हुने कानुनी प्रावधान रहेको प्रहरीले जनाएको छ ।
गत माघ २० गते जिजि ब्रदर्शले संचालन गरेको माइक्रोटिच कम्प्युटर एजुकेशन एण्ड इलेक्ट्रोनिक्स पसलबाट २० वटा मोवाईल सेट र ट्यावलेट चोरी भएको थियो । पसलबाट झण्डै ४ लाख मुल्य बराबरको मोवाइल, ट्याब्लेट लगाएतका इलेक्टोनिक सामाग्री चोरी भएको पसलका प्रोपाइटर गोपाल निरौलाको दावी गरेका छन् ।
मिसनटुडे संवाददाता
प्रकाशित मितिः बिहिबार, बैशाख १६, २०७३