3 December 2020  |   बिहिबार, मंसिर १८, २०७७

मावि शिक्षकमा ६ सय कोटा खुल्दै

मिसनटुडे संवाददाता
प्रकाशित मितिः आइतवार, फाल्गुन २, २०७२  

काठमाडौँ, २ फागुन । शिक्षक सेवा आयोगले मावि शिक्षकका लागि ६ सय विज्ञापन गर्ने भएको छ । विभागले देशभरमा ६ सय ११ शिक्षकको पद रिक्त भएको विवरण दिएपछि नयाँ रोजगारीका अवसर खुलाउन थालेको हो । शिक्षक सेवा आयोगका प्रशासकीय प्रमुख लक्ष्मीराम पौडेलले फागुन महिनामै शिक्षकको विज्ञापन गरिने बताए ।

नेपालको सबैभन्दा बढी पश्चिमाञ्चल विकास क्षेत्रमा शिक्षक दरबन्दी रिक्त रहेका छन् । सो विकास क्षेत्रमा माध्यमिक तहमा मात्र कुल १ सय ९२ शिक्षकको पद रिक्त रहेको शिक्षा विभागका निर्देशक तथा प्रवक्ता वैकुण्ठ अर्यालले बताए । उनका अनुसार माध्यमिक तहका लागि ६ सय ११ दरबन्दी विवरण शिक्षक सेवा आयोगलाई पठाएको हो । अन्य तहका लागि पनि विभागले विवरण माग गरेको छ । एकैचोटी धेरै तहमा विज्ञापन गर्दा सेवा आयोगको परीक्षा दिने व्यक्तिदेखि व्यवस्थापनमा समेत समस्या पर्ने भएकाले पटक–पटक गरेर रिक्त पदपूर्ति गर्दैछ ।

सुविधा राम्रो भएकाले यो पेशामा युवाको आकर्षण धेरै छ । शिक्षक सेवामा प्रवेश गर्नका लागि अध्यापन अनुमति पत्र अनिवार्य गरिएको छ । आयोगका प्रशासकीय प्रमुख पौडेलका अनुसार प्राथमिक, निम्न माध्यमिक तथा माध्यमिक गरी तीन तहमा सात लाखको हाराहारीमा अध्यापन अनुमति लिएर बसेका युवाहरु छन् ।

कुन–कुन विषयमा कति–कति शिक्षक आवश्यक ?

विज्ञानः १४५

अंग्रेजीः १२८

नेपालीः १०७

सामाजिकः ९३

गणितः ८४

लेखाः २०

गणित विज्ञानः ९

स्वास्थ्य, जनसंख्या तथा वातावरणः ७

अर्थशास्त्रः ६

संस्कृत साहित्यः ३

कम्प्युटर विज्ञानः ३

संस्कृत भाषाः ३

शिक्षाः २

ज्योतिष तथा वेदः १

कृषि शिक्षाः १

 

(नयापत्रिका दैनिकमा प्रकाशित)

प्रकाशित मितिः आइतवार, फाल्गुन २, २०७२     4:49:24 PM  |

Leave a Reply

Your email address will not be published. Required fields are marked *