बुटवल, रुपन्देहीको सिद्धार्थनगर नगरपालिकाले ५७औँ स्थापना दिवसको पूर्वसन्ध्यामा आइतबार भैरहवास्थित पक्लिहवा माविको खेल मैदानमा आयोजना गरको मैत्रीपूर्ण क्रिकेट प्रतियोगिताको उपाधि सिद्धार्थनगर नगरपालिकाका कर्मचारीको टिमले हात पारेको छ । फाइनलमा नगरपालिकाका जनप्रतिनिधिको टिमलाई १० विकेटले पराजित गर्दै कर्मचारीको टिमले उपाधि जित्न सफल भएको हो । टस जितेर ब्याटिङ गरेको जनप्रतिनिधिको टिमले निर्धारित १० ओभरमा ६ विकेट गुमाएर ७८ रन बनाएको थियो ।
जबाफी ब्याटिङ गरेको कर्मचारीको टिमले ५ ओभर ४ बलमा बिनाक्षति लक्ष्य पूरा गर्दै उपाधि चुम्यो । खेलमा ३ विकेट लिएका कर्मचारी टिमका जनक थापा प्लेयर अफ द फाइनल घोषित भए । यसअघि जनप्रतिनिधि र कर्मचारीको टिमले लुम्बिनी प्रेस क्लबलाई पराजित गर्दै सेमिफाइनल र फाइनल पुगेका थिए ।
पहिला ब्याटिङ गरेको प्रेस क्लबले १० ओभरमा ८ विकेट गुमाउँदै ५५ रन बनाएको थियो । कर्मचारीको टिमले बिनाक्षति ५ ओभर १ बलमा लक्ष्य पूरा गरी १० विकेटले जित निकालेको थियो । त्यसअघि जनप्रतिनिधिको टिमले प्रेस क्लबको टिमलाई २६ रनले पराजित गरेको थियो । नगरपालिकाले आफ्नो स्थापना दिवस विभिन्न कार्यक्रम गरी मनाउने तयारी गरिरहेको छ ।
स्थापना दिवसको प्रमाणस्वरूप अदालतमा प्रकाशित राजपत्र फेला परेपछि सोही राजपत्रको आधारमा कार्यालयले माघ २२ गते स्थापना दिवस मनाउन लागेको सिद्धार्थनगर नगरपलिकाका प्रमुख इश्तियाक अहमद खाँले बताए । दिवसका अवसरमा कार्यालयले विभिन्न संघ–संस्था, नगरबासीहरूको सहभागितामा नगरमा प्रभातफेरी तथा शुभकामना आदान–प्रदान कार्यक्रम गर्नेछ । नगरपालिकाले प्रभातफेरीमा विद्यार्थीलाई भने सहभागी नगराउने जनाएको छ ।
प्रतिक्रिया दिनुहोस्