मोरङ।
३८औँ संस्करणको विराट गोल्ड कप फुटबल–२०८२ प्रतियोगिताअन्तर्गत आज राति भएको खेलमा चर्च ब्वाइज युनाइटेड क्लब काठमाडौँ सेमिफाइनलमा प्रवेश गरेको छ ।
विराट गोल्ड कप फुटवल ट्रष्टद्वारा विराटनगरको सहिद रङ्गशालामा ‘नकआउट’ आधारमा भएको आजको खेलमा चर्च ब्वाइजले पूर्वसशस्त्र प्रहरीको एपिफलाई १–० गोलले पराजित गरेर सेमिफाइनलको यात्रा तय गरेको हो ।
चर्च ब्वाइजका समीर तामाङले खेलको २७औँ मिनेटमा गरेको गोल नै निर्णायक भयो । आजको खेलमा तामाङले ‘प्लेयर अफ दी म्याच’ तामाङ घोषित भई नगद रु ११ हजार प्राप्त गरेका छन् । नेपाल र भारतका गरी आठ वटा टोली सहभागी प्रतियोगिता आगामी वैशाख ५ मा सम्पन्न हुनेछ ।
प्रतियोगिताको विजेता हुने टोलीले रु ११ लाख, उपविजेताले रु पाँच लाख प्राप्त गर्नेछ भने उत्कृष्ट प्रशिक्षक, उत्कष्ट गोल रक्षक र सर्वाधिक गोलकर्तालाई जनही रु १५ हजार, सर्वोकृष्ट खेलाडीलाई रु ५१ हजार र दैनिक हुने खेलको उत्कृष्ट खेलाडीलाई नगद रु ११ हजार पुरस्कार प्राप्त गरिने ट्रष्टका अध्यक्ष किशोरबहादुर शाहीले जानकारी दिए।
प्रतियोगिता सम्पन्न गर्न रु एक करोड खर्च लाग्ने अनुमान रहेको ट्रष्टका महासचिव विनोद बस्नेतले बताए । प्रतियोगिताअन्तर्गत सोमबारको खेल विभागीय टोली नेपाल पुलिस क्लब र मच्छिन्द्र फुटबल क्लब काठमाडौँबिच हुनेछ। रासस
प्रतिक्रिया दिनुहोस्