राम बहादुर रावत
कोहलपुर, भदौ १७
मध्यपश्चिम क्षेत्रिय ट्राफिक प्रहरी कार्यालय कोहलपुरले रोड परमिट नभएका तीनवटा बसलाई नियन्त्रणमा लिएको छ । नेपालगञ्ज देखि काठमाण्डौ जाने दुई र नेपालगञ्ज देखि विराटनगर जाने एक बसलाई बिहीबार नियन्त्रणमा लिइएको मध्यपश्चिम क्षेत्रिय ट्राफिक प्रहरी कार्यालय कोहलपुरले जनाएको छ ।
नेपालगञ्ज देखि काठमाण्डौका लागि बिहीबार बिहान ना ५ ख ७४८५ र ना ५ ख ९५१४ नम्बरका दुई वटा बसलाई नियन्त्रण लिएको थियो । बसहरुको रोड परमिट रात्रि सेवा भए पनि दिवा सेवा दिएको थाहा भए पछि ट्राफिक प्रहरीले नियन्त्रणमा लिएको हो ।
त्यस्तै नेपालगञ्ज देखि विराटनगर जाने ना ४ ख ४६५७ नम्बरको बसलाई पनि नियन्त्रणमा लिएको छ । दिवा सेवाको लागि हुने पर्ने बसलाई बेलुकी ४ बजे नेपालगञ्जबाट विराटनगर प्रस्थान गराएको थाहा पाए पछि नियन्त्रणमा लिइएको प्रहरीले जनाएको छ ।
नियन्त्रणमा लिएका बसहरुलाई आवश्यक कार्यवाहीका लागि यातायात कार्यलयको जिम्मा दिने मध्यपश्चिम क्षेत्रिय ट्राफिक प्रहरी कार्यालय कोहलपुरले जनाएको छ ।