काठमाडौँ।
मुक्तिनाथ विकास बैंक र नेपालमा टाटा गाडीको आधिकारिक बिक्रेता सिप्रदी ट्रेडिङ प्रालिबीच टाटाको पिकअप तथा साना व्यावसायिक सवारीसाधन खरिद गर्नका लागि कर्जा लगानी गर्ने समझदारीपत्रमा हस्ताक्षर भएको छ । समझदारीपत्रमा बैंकका तर्फबाट प्रमुख कार्यकारी अधिकृत तारा मानन्धर र सिप्रदीको तर्फबाट भाइस प्रेसिडेन्ट सौरभराज थपलियाले हस्ताक्षर गरेका छन् ।
बैंकका प्रमुख सूचना अधिकारी तिलबहादुर गुरुङका अनुसार सिप्रदी ट्रेडिङको अधिकृत डिलरहरूमार्फत टाटा ब्राण्डको पिकअप तथा व्यावसायिक साना सवारीसाधन खरिद गर्ने ग्राहकलाई मुक्तिनाथ विकास बैंकले आफ्नो १७६ वटै शाखा कार्यालयबाट आकर्षक सहुलियत ब्याजदरमा कर्जा सुविधा उपलब्ध गराउने सम्झौता भएको छ ।
सम्झौताअनुसार इभी गाडीतर्फ ६० प्रतिशत तथा आइसीई सवारीसाधनका लागि ७० प्रतिशतसम्म कर्जा सुविधा उपलब्ध हुनेछ ।
यस सहकार्यबाट व्यवसाय, कृषि तथा साना उद्यममा प्रयोगमा हुने व्यावसायिक सवारीसाधन खरिद गर्न चाहने ग्राहकहरूलाई सहज वित्तीय पहुँच प्राप्त हुने तथा व्यवसाय विस्तारमा थप सहयोग पुग्ने अपेक्षा गरिएको छ । साथै बैंकले हाल अटो कर्जा, कृषि र एसएमई कर्जामा समेत न्यूनतम ब्याजदरमा कर्जा प्रवाह गर्ने विशेष अफर ल्याएको प्रमुख सूचना अधिकारी गुरुङले बताए ।
प्रतिक्रिया दिनुहोस्