सुदूरपश्चिम सरकारको खर्च आठ प्रतिशत

कैलाली ।

चालू आर्थिक वर्षको मंसिरसम्ममा सुदूरपश्चिम प्रदेश सरकारको कूल विनियोजित बजेटको आठ दशमलव चार प्रतिशत मात्र खर्च भएको छ । आर्थिक मामिला मन्त्रालयको प्रतिवेदनअनुसार चालू खर्चतर्फ विनियोजित रु १३ अर्ब ६३ करोड ५५ लाख ४२ हजार बजेटमध्ये मंसिरसम्म १६ दशमलव ५१ प्रतिशत खर्च भएको छ ।

पूँजीगततर्फ विनियोजित रु १९ अर्ब ८३ करोड पाँच लाख छ हजारमध्ये दुई दशमलव ८९ प्रतिशत मात्र खर्च भएको छ । यो अवधिमा सवारीसाधन करतर्फ रु २६ करोड ११ लाख ८९ हजार राजस्व संकलन भएको छ । गत आर्थिक वर्षको यसै अवधिमा रु रु २५ करोड ९७ लाख नौ हजार संकलन भएको थियो । घरजग्गा रजिष्ट्रेशन दस्तुर भने घटेको छ ।

यो शीर्षकमा गत वर्ष मंसिरसम्म रु १५ करोड १७ लाख ७० हजार संकलन भएकामा चालू आवको सोही अवधिमा रु आठ करोड २० लाख सात हजार संकलन भएको हो । मनोरञ्जन कर, विज्ञापन कर र प्राकृतिक स्रोतबाट प्राप्त आयमा समेत उतारचढाव देखिएको छ । अन्य सेवा शुल्क तथा बिक्री शीर्षकमा भने गत वर्ष मंसिरसम्मको रु चार करोड १२ लाख ५१ हजारबाट वृद्धि भई यो वर्षको सोही अवधिमा रु आठ करोड २३ लाख ५६ हजार पुगेको छ ।

प्रदेश सरकारले चालू आवमा राजस्व संकलनको लक्ष्य रु एक अर्ब ६५ करोड राखेको छ । गत आव २०८१–०८२ मा राजस्व संकलनको लक्ष्य रु एक अर्ब ६० करोड सात लाख १५ हजार राखेको थियो । आव २०८१–०८२ मंसिरसम्म रु ४८ करोड ७६ लाख २३ हजार संकलन भएकामा चालू आवको सोही अवधिमा रु ४५ करोड २४ लाख ८४ हजार संकलन भएको हो ।