काँग्रेसका सांसदहरु वीरेन्द्र कनौडिया, वसिउद्धिन खान, रमा अर्याल, जनता समाजवादी पार्टीका सन्तोषकुमार पाण्डेलगायतले आफ्नो आवाजको सुनुवाइ नभएपछि तोडफोडमा उत्रिएका थिए । बैठकमा कानुन तथा आन्तरिक मामिलामन्त्री कुलबहादुर केसीले प्रदेश राजधानी र नामको प्रस्ताव छलफलका लागि पेस गर्ने क्रममा उनीहरु नाराबाजी गर्दै तोडफोडमा उत्रिएका हुन् ।
कोहलपुर ।
प्रदेश ५ को प्रदेशसभामा सोमबार नेपाली काँग्रेस र समाजवादी पार्टीका सांसदहरुले तोडफोड गरेका छन् । आफुहरुको विरोध हुँदाहुँदै सभामुख पूर्णबहादुर घर्तीले बैठकलाई निरन्तरता दिएको भन्दै काँग्रेस र समाजवादीका सांसदहरुले प्रदेशसभामा तोडफोड गरेका थिए । सोमबार पहिलोपटक एक बजे सुरु भएको बैठक काँग्रेसले विरोध गरेपछि स्थगित भएको थियो ।
दुई घण्टासम्म पनि कुनै सहमतिको विन्दु नभेटिएपछि फेरी सुरु भएको बैठक काँग्रेसले पुनः अवरुद्ध गर्न खोज्यो । तर, सभामुखले बैठकलाई निरन्तरता दिएपछि काँग्रेसले तोडफोडमा उत्रिएको हो । बैठकमा कानुन तथा आन्तरिक मामिलामन्त्री कुलबहादुर केसीले प्रदेश राजधानी र नामको प्रस्ताव छलफलका लागि पेस गर्ने क्रममा काँग्रेस सांसदहरूले नाराबाजी गर्दै तोडफोड गरेका हुन् । मन्त्री केसीलाई प्रस्ताव पेस गर्नका लागि रोष्ट्रममा जाने क्रममा धक्कामुक्की गरेका सांसदहरूले प्रस्ताव पेश गर्ने क्रममा कुर्सीले टेबुल र माइकमा तोडफोड गरे । ‘संसदीय मर्यादा पालन गर’ भन्ने नारा लगाउँदै काँग्रेस र समाजवादीका सांसदले बैठककक्षमा तोडफोड गरेका थिए । सांसदहरुको तोडफोडकै बीच आन्तरिक मामिला तथा कानुनमन्त्री केसीले प्रदेशसभा बैठकमा प्रदेशको नाम र राजधानीसम्बन्धी प्रस्ताव पेश गर्न सफल भए । सभामुख घर्तीले तोडफोडकै बीच बैठक अघि बढाए ।
प्रदेशको स्थायी राजधानी दाङ देउखुरीलाई बनाउने प्रस्ताव प्रदेश सरकारले प्रदेशसभामा पेश गरेपछि सोही विषयलाई लिएर तनाव सिर्जना भएको हो । सोमबार नै भएको पहिलो बैठक काँग्रेसले अवरुद्ध गर्दा आधा घण्टा संसद बैठक स्थगित भएको थियो । काँग्रेसले राजधानी दाङ लैजानुको औचित्य पुष्टि गर्न आग्रह सरकारलाई आग्रह गरेको थियो । प्रदेशसभामा राजधानी र नामाकरण सम्बन्धी प्रस्तावमाथिको छलफलमा बोल्दै काँग्रेसले तानाशाही शैलीमा यो प्रस्ताव आएको भन्दै आपत्ती जनाएको हो । बैठकमा बोल्दै काँग्रेस संसदीय दलका नेता वीरेन्द्र कनौडियाले व्यक्तिगत स्वार्थमा राजधानी सार्नु गलत रहेको बताएका थिए । ‘मुख्यमन्त्री भनेको प्रदेशभरको हो, उहाँ शालिन नेता हो । तर भेगीय राजनीतिमा लाग्नुभयो । राजधानीको प्रस्ताव ल्याउदा सहमति हुनुपर्थ्यो । खुसीको दिन हो, हर्ष हुनुपर्ने हो । तर बाहिर निषेधाज्ञा छ । मान्छे पक्राउ गरिएको छ । यो तानाशाही शैली भयो, उनले भने ।
बैठकमा सांसदहरु भोजप्रसाद श्रेष्ठ, सांसद विष्णु पन्थी, विजयबहादुर यादव, तारा जिसी, दीपेन्द्र पुन, हरि रिजाल लगायतले छलफलमा सहभागिता जनाएका थिए । छलफलमा भाग लिएका सांसदले मिश्रित प्रतिक्रिया दिए । छलफलमा सांसदहरुले उठाएको प्रश्नको जवाफ दिँदै मन्त्री केसीले प्रदेशको नाम र राजधानी सरकारले तोके अनुसारकै हुने बताएका थिए । उनले हरेक दृष्टिकोण र बैज्ञानिक ढंगबाट राजधानी सही ठाउँमा तोकिएको दावी गरे । संसदमा काँग्रेस र जसपाका सांसदले गरेको तोडफोड निन्दनीय रहेको उनले जनाए । बैठक आज मंगलबार दिउँसो १२ बजे बस्ने गरी स्थगित भएको थियो । सम्भवत् आज बस्ने बैठकले प्रदेशको राजधानी र नामाकरणबारे टुङ्गो लगाउनेछ । सहमतीको आधारमा टुङ्गो नलागेपछि मतदान प्रक्रियाबाट टुङ्गो लगाउने तयारी रहेको छ ।
संसद बैठक अघि बिहान सर्वपक्षीय बैठक बसे पनि सहमति भएन । मुख्यमन्त्री शंकर पोखरेलले काँग्रेस, जसपा र जनमोर्चाका सांसदहरुलाई प्रस्तावित राजधानीमा समर्थन गर्न आग्रह गरेका थिए । तर काँग्रेस सांसदहरुले सहयोग गर्न नसक्ने जनाए । त्यसपछि लगत्तै नेकपा संसदीय दलको बैठक बसेको थियो । बैठकमा संसदीय दलका नेतासमेत रहेका मुख्यमन्त्री पोखरेलले सांसदहरुलाई निर्देशन दिँदै सरकारले प्रस्ताव गरेको राजधानी र नामका पक्षमा मतदान गर्न ह्विप जारी गरेका थिए ।
उता संसदमा नाराबाजी र तोडफोडका बीच पनि बैठक चलिरहेको थियो भने बाहिर नेपालगञ्ज रोडमा काँग्रेस, नेकपा लगायत विभिन्न संघसंस्थाले विरोध गरिरहेका थिए । संसद भवन वरिपरी, बुटवल र आसपासको क्षेत्रमा व्यापक सुरक्षाकर्मी परिचालन गरेर सुरक्षा व्यवस्था कडा पारिएको थियो ।