योगिनी युथ क्लबको सहयोग



नेपालगञ्ज ।

बाँकेको खजुरा गाउँपालिकाको गौघाट क्वारेन्टिनमा बसिरहेका युवालाई स्थानीय योगिनी युथ क्लबले सहयोग गरेको छ । क्लबका अध्यक्ष तरिन्द्र बहादुर थापाको नेतृत्वमा क्वारेन्टिनमा रहेका युवाहरुका लागि सर्जिकल मास्क, सेनेटाइजर, पानी पिउने बोत्तल, जग र डिस्टेम्पर सहयोग गरिएको थियो । खजुरा गाउँपालिका वडा नम्बर २ स्थित योगिनी उच्च मावि क्वारेन्टिनमा ७१ जना बसिरहेका छन । भारतबाट आएका नेपालीलाई व्यवस्थापनमा समस्या भैरहेको बेला योगिनी युथ क्लबले सहयोग गरेको हो ।

योगिनी कप फुटबल प्रतियोगिताका संयोजक तथा क्लबका अध्यक्ष थापाले क्वारेन्टिन व्यवस्थापनमा आगामी दिनमा सहयोग गर्ने प्रतिवद्धता जनाए । भारतबाट आउने नेपालीको संख्या बढिरहेको बेला क्वारेन्टिनमा रहेका युवालाई सबैले आ–आफ्नो तर्फबाट सहयोग गर्नु पर्ने थापाले बताए । उनले भने ‘गौघाटको क्वारेनटाइनमा रहेका युवालाइ पिउने पानीको समेत समस्या देखियो । उनीहरुको सरसफाइमा पनि ध्यान दिइएको छैन । गाउँपालिकाले उचित व्यवस्थापन गर्न नसकेको बेला स्थानीय स्तरबाट सहयोग गर्न जरुरी छ । यसले युवाहरुलाई कोरोना संक्रमणबाट बचाउन र समुदायलाई सुरक्षित राख्न सहज हुन्छ ।’

अध्यक्ष थापाका अनुसार १० हजार रुपैयाँ बराबरको मेडिकल सामाग्री सहयोग गरिएको हो । क्लबका सदस्यले स्वस्फुर्त रुपमा आर्थिक संकलन गरेर सहयोग गरेको उनले बताए । क्वारेन्टिन व्यवस्थापनमा सहयोग गर्ने क्लबका सम्पुर्ण सदस्यलाई थापाले धन्यवाद दिए । मेडिकल सामाग्री प्रदान गर्नमा क्लबका महासचिव गणेश राई, दिलिप महतारा, राजन निरौला, विशाल खत्री, विष्णु शाही, सुनिल विष्ट, कमल खत्री लगायतका सदस्यले सहयोग गरेका थिए ।

सहयोग सामाग्री योगिनी युथ क्लबका अध्यक्ष थापा र महासचिव राईले आइतबार खजुरा गाउँपालिका वडा नम्बर २ सदस्य एवम् क्वारेन्टिन व्यवस्थापन समिति संयोजक टोप बहादुर महतारा, योगिनी उच्च मावि विद्यालय व्यवस्थापन समिति अध्यक्ष हिम बहादुर पुन, कांग्रेस स्थानीय नेता माया नेपाललाई हस्तान्त्रण गरेका हुन् । सहयोग सामाग्री ग्रहण गर्दै वडा सदस्य महताराले योगिनी युथ क्लबका युवाहरुलाई धन्यवाद दिए । उनले भने, ‘गाउँको युवाहरुले राम्रो काम गरेका छन ।

उहाँहरुको सहयोग महत्वपुर्ण छ । क्वारेन्टिनमा बसेकाहरुलाई अति आवश्यक परेको कुरा सहयोग गर्नु भएको छ । यसले हामीलाई क्वारेन्टिन व्यवस्थापनमा सहयोग गर्नेछ ।’ बाँकेका ८ वटै स्थानीय तहमा अहिले भारतबाट आउनेको संख्या बढिरहेको छ । भारतबाट आउनेको संख्या बढिरहेको बेला स्थानीय तहलाई क्वारेन्टिनमा व्यवस्थापनमा कठिन भैरहेको छ । योगिनी उच्च मावि गौघाटको क्वारेन्टिनमा बसेको एक युवाले एउटै कोठामा ११ जना सुत्नु परेको बाध्यता सुनाए । उनले भने, ‘आएको दश दिन पछि हाम्रो परीक्षण भयो । जति आउँछन सबैलाई एकै ठाउँमा राख्ने गरिएको छ । अहिलेसम्म सामान्य स्वास्थ्य समेत परीक्षण गरिएको छैन । यसले त झन् क्वारेन्टिनमै संक्रमणको जोखिम बढेको छ । परीक्षण गर्नमा गाउँपालिकाले ध्यान दिएको छैन ।’ योगिनी युथ क्लबले स्थानीय स्तरमा सामाजिक र खेलकुद प्रतियोगिता गर्दै आएको छ ।

  • No tags available
प्रकाशित मिति : २०७७ जेठ १९ गते सोमबार