3 February 2023  |   शुक्रबार, माघ २०, २०७९

एक महिनामा ३६ फरार वन्यजन्तु अपराधी पक्राउ

मिसनटुडे संवाददाता
प्रकाशित मितिः सोमवार, फाल्गुन १०, २०७२  

सुदीप अधिकारी

बर्दिया,१० फागुन

विभिन्न समयमा वन तथा वन्यजन्तु अपराधमा संलग्न भएर फरार रहेका अपराधीहरु यतीखेर धमाधम पक्राउ पर्ने थालेका छन् । केही महिना यता निकुञ्ज र प्रहरीको राष्ट्रिय अनुसन्धान ब्यूरो (सीआइबी)ले विशेष अभियान थालेपछि फरार अपराधीहरु धमाधम पक्राउ पर्न थालेका हुन् ।

एक महिना यता ३६ जना फरार अपराधीहरु पक्राउ परिसकेको बर्दिया निकुञ्जका प्रमुख संरक्षण अधिकृत रमेशकुमार थापाले जानकारी दिए । निकुञ्जको विवरण अनुसार अघिल्लो माघ महिनासम्म १ सय ५५ जना वन्यजन्तु अपराधीहरु फरार थिए । एक महिनामा अहिले यो संख्या घटेर १ सय १७ पुगेको छ । पछिल्लो समयमा फरार अपराधीलाई पक्राउ गर्न निकुञ्ज र सीआइबीले सक्रियता देखाएपछि पक्राउ पर्ने क्रम बढ्दै गएको हो ।

निकुञ्ज स्रोतका अनुसार बर्दियामा अझै ९३ जना वन्यजन्तु अपराधीहरु फरार छन् । यसैगरी सुर्खेतका १५ जना, कैलालीका ८ र बाँकेका २ जना फरार छन् । भने कालिकोट, बाजुरा र काठमाण्डौका १÷१ निकुञ्जको फरार सूचीमा छन् । फरार व्यक्तिहरुको खोजीका लागि निकुञ्ज र प्रहरी (सीआइबी)ले स्वीप अप्रेशन जारी राखेको निकुञ्जले जनाएको छ ।

सुरक्षा निकय र निकुञ्ज प्रशासन बिच राम्रो समन्वय बढेकाले फरार अपराधी पक्राउ गर्न सहज हुँदै गएको निकुञ्जका प्रमुख संरक्षण अधिकृत रमेशकुमार थापाले बताए । उनले भने,‘ अहिले प्रहरी प्रशासन र निकुञ्ज बिच प्रभावकारी समन्वय भइरहेको छ । जसका कारण धमाधम अपराधीहरु पक्राउ पर्न थालेका छन् । यो हाम्रो लागि ठूलो उपलब्धी हो ।’

प्रकाशित मितिः सोमवार, फाल्गुन १०, २०७२     6:15:08 PM  |