कोहलपुर, २३ माघ
आफ्नै श्रीमान्द्वारा पेट्रोल छर्किएर शरीरमा आगो लगाउँदा गम्भीर घाइते भएकी कोहलपुर–२ शक्तिनगरकी गंगा विकको स्वास्थ्य अवस्था सुधारोन्मुख हुँदै गएको छ । पेट्रोलका कारण शरीरको २० प्रतिशत भाग जलेकी गंगाको काठमाडौंस्थित टिचिङ अस्पतालमा उपचार भइरहेको छ । गंगाका जेठाजु सिर्जन विकका अनुसार गंगाको स्वास्थ्य अवस्था सुधारोन्मुख हुँदै गएको छ ।
गंगाको स्वास्थ्य अवस्था सुधार हुँदै गएको र अहिले राम्रोसँग बोल्न सक्ने अवस्थामा पुगेको उनले बताए ।

काठमाडौं ल्याएपछि क्रमिकरुपमा बुहारीको स्वास्थ्य अवस्था सुधार हुँदै गएको सिर्जन बताउँछन् । माघ १५ गते साँझ कोहलपुर–२ शक्तिनगरका भानुभक्त विकले आफ्नै छोरा र श्रीमतीको शरीरमा पेट्रोल छर्किएर आगो लगाएका थिए । लगत्तै २ वर्षीय छोरा प्रिन्स र गंगालाई उपचारका लागि कोहलपुरस्थित नेपालगन्ज मेडिकल कलेज शिक्षण अस्पताल कोहलपुरमा लगिएको थियो । त्यहाँ उपचार हुन नसकेपछि दुवैजनालाई नेपालगन्जस्थित भेरी अस्पतालमा लगियो । पेट्रोलका कारण कम्मरभन्दा माथिको शरीर पूर्णरुपमा जलेका प्रिन्सको उपचारको क्रममा १६ गते बिहान निधन भएको थियो ।
गंगालाई भने नेपालगन्जमा उपचार सम्भव नभएपछि माघ १७ गते स्थानीय सरकार, स्थानीय प्रशासन, अस्पताल, सुरक्षा निकाय र महिला अधिकारवादी संस्थाको समन्वयमा थप उपचारका लागि काठमाडौं लगिएको थियो । ‘बुहारीको स्वास्थ्य अवस्था धेरै सुधार भएको छ । मासु र अण्डा बढी खानु भनेको छ । उपचारका लागि धेरै ठाउँबाट सहयोग पनि प्राप्त भइरहेको छ । सञ्चो हुनेमा ढुक्क छौँ,’ उनले भने ।









प्रतिक्रिया दिनुहोस्