अदालतमा आगजनी गरेको आरोपमा तीन पक्राउ

कैलाली ।

जेनजी आन्दोलनको क्रममा कैलाली जिल्ला अदालतमा आगजनी गरेको आरोपमा तीन जना पक्राउ परेका छन् । अदालतले दिएको उजुरीको आधारमा प्रहरीले उनीहरूलाई धनगढीबाट पक्राउ गरेको हो । पक्राउ पर्नेमा धनगढी उपमहानगरपालिका–३ का ३० वर्षीय अमन केसी, २४ वर्षीय आशिष भण्डारी र बैतडीको पुर्चौडी घर भइ धनगढी उपमहानगरपालिका–३ मै बस्दै आएका २४ वर्षीय भरत बम रहेका छन् ।

धनगढी उपमहानगरपालिका–१ मा रहेको कैलाली जिल्ला अदालतमा भदौ २४ गते आगजनी र तोडफोड भएको थियो । आगजनीबाट अदालतमा रहेको २००७ सालदेखिका मिसिलहरू जलेर नष्ट भएका थिए । यसैगरी, कम्प्युटर लगायतका सूचना प्रविधिका विभिन्न सामग्रीमा क्षति भएको थियो ।

घटनाको अनुसन्धान गरी दोषीलाई कारबाहीको माग गर्दै अदालतले दिएको जाहेरीका आधारमा तीनै जनालाई पक्राउ गरेको जिल्ला प्रहरी कार्यालय कैलालीका सूचना अधिकारी प्रहरी नायब उपरीक्षक (डीएसपी) राजकुमार सिंहले बताए । उनले अहिलेसम्म अरू सरकारी कार्यालयहरूले भने जाहेरी नदिएको उल्लेख गरे । ‘अहिलेसम्म हामी कहाँ जाहेरी आएको अदालतकोमात्रै हो’ डीएसपी सिंहले भने, ‘जाहेरी परेपछि आरोपितलाई पक्राउ गरेका छौँ ।’