शेरबहादुर ऐर । कैलाली ।
पक्की तटबन्धन भइसकेको छ । सडकमा माटो फालिएको छ भने ठाउँ–ठाउँमा गिट्टी फालिएको छ तर, फिँजाइएको छैन् । दृश्य निर्माणाधीन हुलाकी सडक आयोजनामार्फत भजनी नगरपालिकास्थित लालबोझीको रिभर टे«निङ आयोजनाको हो । यो सडकको सम्झौता २०८० वैशाख १४ गते भएको थियो भने निर्माण २०८१ कार्तिक १३ गते सम्पन्न गर्नुपर्ने अवधि रहेको थियो । तर, अहिले २०८२ बैशाख १३ गतेसम्म सम्पन्न गर्नुपर्ने अवधि रहेपनि आयोजनाले तोकेको तटबन्धन र सडक क्षेत्रमा पूर्णरूपमा अघि बढन सकेको छैन् । सडकको लम्बाइ नौ सय ५० मिटर रहेको र चौडाइ सात मिटर रहेको छ ।
स्थानीय फागुराम डङ्गौराले सडक समयमै नबन्दा सास्ती भोग्नु परिरहेको बताए । ‘सडकमै गिट्टी राखिएको छ । फिँजाइएको छैन् । फालिएको माटो घरभित्रै पस्छ,’ उनले भने ‘सडकमा एउटा बस, ट्याक्टर गुडाएमा साँघुरो बन्छ, जाम हुन्छ ।’ उनले पहिले कटानले समस्या दिँदै आएको बताउँदै भने, ‘अहिले तटबन्धन भएको छ । अब कटानको समस्या छैन् । तर, ठेक्का सम्झौता पाएको निर्माण कम्पनीले समयमै काम सुरु गर्नुपर्छ ।’
सोही हुलाकी सडकमा टीकापुरबाट धनगढीतर्फ आइरहेका गोकर्णप्रसाद जोशीले हुलाकी सडक समयमै नबन्दा धुलो, धुवासँगै वातावरणनै प्रदूषण भइरहेको बताए । उनले ठेक्का सम्झौता पाएको कम्पनीले ढिला सुस्ती गर्दा सो सडकमा यात्रा गर्ने यात्रुले सास्ती पाइरहेको बताए । स्थानीय दिपा चौधरीले सडक समयमै नबन्दा त्यहाँबाट उडिरहेको धुलोले धानबालीमा क्षति पु¥याइरहेको बताइन् । उनले भनिन्, ‘सडक निर्माणमा ढिला सुस्ती हुँदा धेरै नराम्रो लागिरहेको छ ।’
स्थानीय लालबहादुर राजीले सडक निर्माणाधीन अवस्थामा रहेकोमा खुसी थिए तर, सडकमा राखिएको गिट्टी नफिँजाइदा दुःखी देखिन्थे । उनले भने, ‘गिट्टी फिँजाइदिएको भए दुईतर्फी गाडी गुड्न पाउँथे तर, एकतर्फी बनाइएको छ ।’
हुलाकी सडक कार्यालयका सूचना अधिकारी गणेशबहादुर बुढाले अहिले कान्द्रा नदीमा सञ्चालन भइरहेको आयोजनाको कार्य तीव्र रूपमा अघि बढेको बताए । उनले आयोजनाको प्रगति विवरण सन्तोषजनक रहेको बताए । तर, केही क्षेत्रमा विवाद हुँदा आयोजना प्रभावित भइरहेको बताए । उनले वन क्षेत्रले आयोजनालाई अघि बढाउन नदिँदा ठेक्का सम्झौता पाएको कम्पनीलाई काम गर्न समस्या भइरहेको बताए । उनले भने, ‘नौ सय ५० मिटरभित्र तटबन्धन र ग्राभेल गर्ने योजना हो । तर, वन क्षेत्रले सो आयोजनाका लागि क्षेत्र खाली नगर्दा समस्या भइरहेको हो । यसबारेमा सरोकारवालाहरूसँग कार्यालयले छलफल गरिरहेको छ । छिट्टै योबारे निकास हुने छ ।’
उनले आयोजनाका लागि संघीय सरकारले १३ करोड ७४ लाख विनियोजन गरेको थियो । अहिले केही लागत घटाइएको छ । तर, हालसम्म सो आयोजनामा ११ करोड ९९ लाख खर्च भइरहेको छ । जुन आयोजनाको कुल प्रगति ८८ प्रतिशत हो । आयोजनालाई यही वैशाख १३ गतेभित्रै सम्पन्न गरिसक्नुपर्ने गरी म्याद थप भएको उनको भनाइ छ । यसरी समयमै आयोजना सम्पन्न हुन नसकेको यो मात्र होइन् । कैलालीसहित सुदूरपश्चिममा करोडौँका आयोजना सञ्चालन हुन्छन् तर, समयमै सम्पन्न नहुँदा आयोजनाबाट जनता खुसी भन्दा निराशा बढी व्यक्त गरिरहेका छन् ।
प्रतिक्रिया दिनुहोस्