माओवादी केन्द्रले बाढी पीडितलाई सहयोग गर्ने



कोहलपुर।

नेपाल कम्युनिष्ट पार्टी माओवादी केन्द्र कोहलपुर नगर समितिले बाढी पीडितहरुलाई सहयोग उपलब्ध गराउने भएको छ । यसअघि कोरोना महामारीको समयमा विपन्न नागरिकलाई खाद्यन्न सहयोग गर्न र अन्य सहयोग तथा राहत र उद्धारका लागि माओबादी केन्द्रले अभियान नै सञ्चालन गरेको थियो । अब कोेरोना महामारी कम हुँदै गएको र मनसुन शुरु भएसँगै त्यसबाट पीडितहरुलाई सहयोग गर्ने माओबादी केन्द्रले जनाएको हो ।

माओवादी केन्द्र कोहलपुरका अध्यक्ष तुला राज बिष्टले दलको तर्फबाट बाढी, डुबान तथा कटानका कारण समस्याका परेकाहरुलाई सहयोग गर्ने निर्णय भएको जानकारी दिए । उनका अनुसार प्राकृतिक प्रकोपबाट प्रभावित भएकाहरुको उद्धार तथा व्यवस्थापनका साथै सहयोग गर्ने निर्णय गरिएको हो ।

उनले कोरोना पीडित राहत कोष मार्फत अहिले सम्म कोहलपुरका विभिन्न वडाका विपन्न अपांगता भएका व्यक्ति, तथा बृद्धबृद्धाहरुलाई समेत सहयोग गरिएको बताए । करिब १ महिनासम्म चलेको अभियानको क्रममा कुल ७ सय ५० जनालाई केन्द्रले सहयोग गरेको उनको भनाइ थियो ।

यता माओबादी केन्द बाँकेका यूवा नेता नरेन्द्र न्यौपानेले कोरोना महामारीको समयमा कार्यक्रर्ताले व्यक्तिगत रुपमा संकलन गरेको राहत आवश्यकता अनुसार बाढी पीडितहरुलाई राहत स्वरुप वितरण गरिने जानकारी दिए । विपत्तिको समयमा हुने खानेहरुले हुँदा खाने तथा समस्यामा परेकाहरुलाई सहयोग गर्नको लागि रहात तथा उद्धार अभियानलाई निरन्तरता दिइने बताए ।

पार्टीका केन्द्रीय अध्यक्ष प्रचण्डको निर्देशन अनुसार बाढी पीडितहरुलाई सहयोग गर्नको लागि युवाहरुको स्यंमसेवक टिम समेत निर्माण गरिएको छ । यस्तै माओबादी केन्द्रमा बाढी तथा डुबानबाट क्षति भएका गाउँ तथा टोलमा वडा कमिटीलाई सक्रिय बनाइने भएको छ ।

  • No tags available
प्रकाशित मिति : २०७८ असार ३ गते बिहीबार