18 September 2021  |   शनिबार, अशोज २, २०७८

वामपन्थी दललाई भोट नदिन भारतीय सुरक्षा अधिकारीको दबाब

मिसनटुडे संवाददाता
प्रकाशित मितिः मङ्लबार, कार्तिक ७, २०७४  

नेपालगन्ज /   भारतीय सिमावर्ती क्षेत्रमा आवागमन गर्ने नेपाली नागरिकलाई त्यहाँका सुरक्षा अधिकारीले नेपाली क्षेत्रमा वामपन्थी दललाई भोट नदिन दबाब दिँदै आएको खुलेको छ । बाँकेको सिमावर्ती क्षेत्रमा आवतजावत गर्ने नेपालीलाई पार्टी सोधेरै एमाले वा वामपन्थी कुनै गुटमा भोट नदिन दबाव दिँदै आएका छन् ।

बाँके राप्तीपारि नरैनापुर गाउँपालिका स्थित घोडदौरिया, ककरदरी, सुईया र रामपुर नाका भएर भारतीय क्षेत्रमा प्रवेश गर्ने नेपाली नागरिकलाई एसएसबी र अनुसन्धान अधिकारीले वामपन्थी घटक विरुद्ध प्रचार र परामर्श गर्दै आएका हुन् । नेपाली क्षेत्रमा कम्युनिष्ट शासन ब्यवस्था भएमा नाकाबन्दी जस्तै अवस्था हुने भन्दै कम्युनिष्ट बाहेकका पार्टीलाई भोट दिन उनीहरुले दबाव दिएको खुलेको हो । चेकजाँचमा एसएसबीले कुन पार्टीलाई भोट दिएको हो प्रश्न गरेको थियो, नरैनापुरका रईस खाँले, एमाले भनेपछि मेरो सामाग्री रोकियो । पार्टी विचार गरेर भोट दिन सुझाव आयो, गंगापुरका रामेश्वर गोडियाले भने, एमाले, माओवादी जस्ता पार्टीमा भोट नदिएर अन्य पार्टीमा दिन एसएसबीले भनेको हो, ।

नेपाली क्षेत्रमा वामपन्थी गुट हाबी भएमा भारतीय सहयोग बन्द हुने र दुबै देशमा आवागमन नहुने चेतावनी दिइएको गोडियाले बताए । नाका भएर भारतीय क्षेत्रमा जाँदा पार्टी नुखाए सुखै हुँदैन, कटकुईयाका बेचै यादवले भने, आवतजावत गर्दा, पार्टी, नाम, ठेगाना र आगामी कुन पार्टीमा भोट दिने भन्ने सबै खुलाउनु पर्छ । यो उनीहरुले अध्ययन गरिरहेको जानकारी दिएका छन्, यादवले भने, सिमा क्षेत्रमा कुन पार्टीको कार्यकर्ता धेरै रहेको त्यस बारे अध्ययन सुरु भएको एसएसबीले भनेको छ । २०६३ सालमा मधेश आन्दोलन पछि भारतीय एसएसबीले मधेशी पार्टीलाई भोट दिन जनतालाई सुझाव र दबाव दिएको थियो । सिमा क्षेत्रमा यसरी गतिविधि चलाउन हुन्छ कि हुँदैन ? प्रश्नमा बीओपी (एसएसबी) ककरदरीका प्रमुख सुभाष शर्माले सीमा क्षेत्रमा त्यस्तो कुनै गतिविधि नभएको दाबी गरेका छन् । यद्यपि, सुइया देखि सन्तलिया सम्म एसएसबीका विभिन्न नाकाहरु रहेकाले कुनै त्यस्तो गतिविधि भएको भए जाँच गर्ने बताए । ‘नेपालमा राजनीतिक चासो हाम्रो होइन‘, उनले भने हाम्रो काम सुरक्षा गतिविधि हेर्ने हो । Nepalgunjnews

प्रकाशित मितिः मङ्लबार, कार्तिक ७, २०७४     1:56:26 PM  |