19 September 2021  |   आइतवार, अशोज ३, २०७८

मुख्य दलले टुंगाए उम्मेदवार

मिसनटुडे संवाददाता
प्रकाशित मितिः शुक्रबार, जेष्ठ १२, २०७४  

बर्दिया, १२ जेठ  निर्वाचनको मिति नजिकिँदै गएसँगै बर्दियामा रहेका मुख्य दलहरुले स्थानीय तहका लागि उम्मेदवार टुंगो लगाएका छन् । लामो छलफल र रस्साकस्सीबिच कांग्रेस, माओवादी केन्द्र र राप्रपाले उम्मेदवार टुंगो लगाएका छन् । नेकपा एमालेले भने यस अघि नै उम्मेदवार टुंगो लगाइसकेको थियो ।
लामो छलफल पछि नेपाली कांग्रेस बर्दियाले सदरमुकाम गुलरिया नगरपालिकाको मेयर पदका लागि मुक्तिनाथ यादव
(किट्टु) र उपमेयरमा सुशीला गिरीको नाम सार्वजनिक गरेको छ । राजापुर नगरपालिकाको मेयर पदमा दीपक जंग शाह तथा उपमेयर पदमा तारा चौधरी, बारबर्दिया नगरपालिकाको मेयरमा परशुराम चौधरी र उपमेयरमा कोपिला गिरी रहेको पार्टीले जनाएको छ ।
यसैगरी बाँसगढी नगरपालिकाको मेयरमा गंगाधर पौडेल र उपमेयरमा रत्ना चौधरी, गेरुवा गाउँपालिकाको अध्यक्षमा जवानसिंह केसी, उपाध्यक्षमा हेमकुमारी चौधरी उम्मेदवार रहेका छन् । बढैयाताल गाउँ पालिकाको अध्यक्षमा मानबहादुर वुढा र उपाध्यक्षमा भगनदैया चौधरी रहेको नेपाली कांग्रेस बर्दियाले जनाएको छ ।
मधुवन नगरपालिका र ठाकुरबाबा नगरपालिकामा भने अझै टुंगो लगाउन सकेको छैन । यहाँ आकांक्षीको संख्या धेरै भएपछि निर्णय गर्न नसक्दा केन्द्रमा नाम पठाइएको बताइएको छ । स्थानीय तहका सबै वडामा उम्मेद्वारको टुङ्गो लागिसकेको नेपाली कांग्रेस जिल्ला कार्य समिति बर्दियाले जनाएको छ ।
यस्तै माओवादी केन्द्र बर्दियाका इन्चार्ज हिमालका अनुसार सदरमुकाम गुलरिया नगरपालिकाको मेयर पदका लागि गेहेन्द्र ढकाल र उपमेयर पदका लागि मोहन कुमारी (मिथिला) फुँयाललाई उम्मेदवार तोकिएको छ ।
मधुवन नगरपालिकामा मेयर गणेश केसी र उपमेयर शुभरानी थारु, बाँसगढी नगरपालिकाको मेयर पदमा विनाराम थारु र उपमेयर पदमा भूमी विक, बाराबर्दिया मेयरमा दुर्गाबहादुर थारु र उपमेयरमा सुभरानी थारु उम्मेदवार रहेका छन् ।
ठाकुरबाबा नगरपालिका मेयरमा नेत्रराज आचार्य र उपमेयरमा कृष्णा थारु ‘आस्था’, गेरुवा गाउँपालिकाको अध्यक्ष पदमा वेगराज थारु, उपाध्यक्षमा लिला थारु र बढैयाताल गाउँपालिकामा अध्यक्ष लल्लुराम थारु उपाध्यक्ष राधा आचार्य उम्मेदवार रहेको पार्टी इन्चार्ज तिलक शर्मा ‘हिमाल’ ले जानकारी दिए ।
यसैगरी राप्रपाले पनि उम्मेद्वार टुंगो लगाएको छ । राप्रपाले गुलरिया नगरपालिकाको मेयरमा मनोज वर्मा, मधुवन नगरपालिकाको मेयरमा नरेशजंग शाह, उपमेयरमा शारदा सिंह, राजापुर नगरपालिका मेयरमा जीवराज रेग्मी, उपमेयरमा रामकली थारु उम्मेदवार चयन भएका छन् ।
ठाकुरबाबा नगरपालिका मेयरमा श्रीराम थारु, उपमेयरमा अमृता खड्का, बाराबर्दिया नगरपालिका मेयरमा हरिश्चन्द्र शाह, उपमेयरमा जयन्ती विष्ट र बाँसगढी नगरपालिकामा मयेर रमचरण चौधरी, उपमेयरमा धनादेवी थापा उम्मेद्वार चयन भएका छन् ।
बढैया गाउँपालिका अध्यक्षमा कलबहादुर हमाल, उपाध्यक्षमा सीतादेवी पौडेल र गेरुवा गाउपालिकामा अध्यक्षमा टेकराज थारु, उपाध्यक्षमा सरस्वती चौधरी उम्मेदवार रहेका छन् । मधेशवादी दलले भने केन्द्रको निर्णय अनुसार अघि बढ्ने बताएका छन् ।

प्रकाशित मितिः शुक्रबार, जेष्ठ १२, २०७४     12:18:09 PM  |