15 April 2021  |   बिहिबार, बैशाख २, २०७८

राप्तीपारीको लक्ष्मणपुर प्राथामिक स्वास्थ्य केन्द्र दुई वर्षदेखि डाक्टरबिहीन

मिसनटुडे संवाददाता
प्रकाशित मितिः शुक्रबार, जेष्ठ १२, २०७४  

आरपी सुवेदी

१२ जेठ, बाँके । बाँकेको विकट क्षेत्रमा रहेका स्वास्थ्य केन्द्रहरुमा एमविविएस डाक्टरको दरबन्दी हुँदा पनि लामो समयदेखि जिल्ला जनस्वास्थ्य कार्यालय बाँकेले डाक्टर खटाउन सकेको छैन ।

सरकारी छात्रबृत्ति तथा जिल्ला जनस्वास्थ्य कार्यालय अन्तरगत दरबन्दी भएका डाक्टर तथा स्वास्थ्यकर्मी पनि सुविधा सम्पन्न ठाउँ मै कोचिएर बस्दा कार्यालयले उनीहरुको उचित व्यवस्थापन गर्न सकेको छैन । बाँकेको राप्तीपारीको लक्ष्मणपुर प्राथमिक स्वास्थ्य केन्द्रमा चिकित्सक सहितको जनशक्ति अभावका कारण नागरिकहरु स्वास्थ्य सेवाबाट बञ्चित हुनुको साथै उनीहरु समस्यामा परे सीमापारी भारतीय बजार जान बाध्य छन् ।

यद्यपी बाँकेको बनकटवा प्राथामिक स्वास्थ्य केन्द्रमा एक जना डाक्टरको दरबन्दी हुँदा ३ जना डाक्टर कोचिएर बसेका छन् भने खजुरमा रहेको प्राथामिक स्वास्थ्य केन्द्रमा दुई जना डाक्टरहरु रहेका छन् । दुबै सुविधायुक्त स्थान हुन ।

लक्ष्मणपुर प्राथामिक स्वास्थ्य केन्द्रका प्रमुख मेडिकल अधिकृत डा. राजेशकुमार मण्डल करिब दुई बर्षदेखि लामो अध्ययन विदा वसेपछि स्वास्थ्य सेवा केन्द्र नै प्रमुखविहीन बनेको छ । केन्द्र प्रमुख मात्र नभई सो अस्पतालका वरिष्ठ कर्मचारीसमेत रिक्त रहेको अवस्था छ ।

केन्द्रमा डाक्टरसहित रहेको ११ जनाको कर्मचारीको दरबन्दीमा हाल जम्मा ६ जना कर्मचारी कार्यरत रहेकाहरु पनि नियमित उपस्थित नरहेको स्थानीयले गुनासो गरेका छन् । लामो समयदेखि चिकित्सक विदामा बस्ने र अन्य स्वास्थ्यकर्मीको पद रिक्त हुनुले सो क्षेत्रका नागरिकहरु स्वास्थ्य सेवाको अनुभुति समेत गर्न नसकेका स्थानीय गुरद्दिन यादवले गुनासो गरे ।

कालाफाँटा स्वास्थ्य केन्द्रका हेल्थ असिस्टेन्ट रामदत्त जोशी सरुवा भएर बाँकेकै पिप्रहवा आएपछि त्यहाँपनि एचएको पद खाली छ ।

यसैबीच जिल्ला जनस्वास्थ्य कार्यालय बाँकेका प्रमुख तथा बरिष्ठ जनस्वास्थ्य प्रशासक खिमबहादुर खड्काले केही दिन भित्र बाँकेका सबै स्वाथ्य केन्द्रमा आवश्यक जनशक्ति पूर्ती हुने दावी गरे । उनले बनकटवा र खजुरामा रहेका डाक्टरहरुको बारेमा जानकारी दिँदै भने- ‘बनकटवामा एक जना डाक्टरको करार अवधि पूरा भएको छ । भने एकजना भर्खरै आउनु भएको हो । खजुरामा पनि त्यस्तै हो ।’ उनले लक्ष्मणपुरमा भरतपुरबाट एकजना डाक्टर सरुवा भएर आएको भएपनि हालसम्म हाजिर हुन नआएकोले समस्या भएको दाबी गरे ।

जिल्लामा रहेका स्वास्थ्य केन्द्रमा आवश्यक जनशक्ति नभएर जनताले पाउनु पर्ने सेवा नपाई दुःख पाएको अवस्थामा जिल्ला जनस्वास्थ्य कार्यालयमा दरबन्दी नै नभएर लामो समयदेखि राजनीतिक पहुँचको आधारमा केही कर्मचारी जगेडा बस्दै आएको बताइन्छ ।

प्रकाशित मितिः शुक्रबार, जेष्ठ १२, २०७४     11:55:14 AM  |

Leave a Reply

Your email address will not be published. Required fields are marked *