केशव राना
कोहलपुर, साउन २८
बाँकेका वनहरुमा रातको समयमा काठ तस्करी व्यापक रुपमा हुने गरेको पाइएको छ । बाँकेको शितलछायाँ, रानी, उषा हरियाली लगायतका वनहरुमा व्यापक रुपमा तस्करी हुने गरेको पाइएको हो । राती वनमै सालका रुख ढाल्दै गोलिया बनाएर साइकलमा काठ तस्करी हुने गरेको छ । जिल्ला वन र शितलछायाँ सामुदायिक वन कोहलपुरको संयुक्त गस्ती टोलीले बिहीबार सालको काठ सहित तस्करलाई पक्राउ गरेको छ । राती साढे २ बजे ७ गोलिया काठ सहित कोहलपुर १३ सिमरीका दिलबहादुर वलीलाई सुगाखोलाबाट पक्राउ गरिएको हो । शितलछायाँ सामुदायिक वनमा रुख काटेर काठको गोलिया तस्करी गरिरहेको अवस्थामा उनलाई पक्राउ गरिएको शितलछायाँ वनका अध्यक्ष हरिप्रसाद शर्माले बताए । ‘गस्ती गर्दै जाँदा सुगाखोलामा तस्करी गरिरहेको अवस्थामा एकजना तस्करलाई फेला पा¥यौं’ उनले भने ‘अन्य भने फरार भए ।’
गस्ती टोलीले काठ बाँधिएको अवस्थामा ७ वटा साईकल, २ थान आरा र ४ थान बन्चरो बरामद् गरेको छ । बरामद् काठ १५.०५ क्यु फिटको रहेको लख्ना रेञ्जपोष्टका रेञ्जर रामकुमार चौधरीले बताए । बरामद् गरिएका काठ, साइकल र औजारहरु जिल्ला वन कार्यालयमा बुझाइएको छ । यसअघि पनि पटक–पटक तस्करी हुने गरेकोमा विगत ३ महिनादेखि रातोदिन गस्ती गर्दै आइरहेको अध्यक्ष शर्माले बताए । विगत ४ वर्षयता सय बढी रुखहरु काटेर सय बढी रुखहरु कटान गरी चोरी तस्करी भएको अध्यक्ष शर्माको भनाई छ । शितल छायाँमा मात्रै होइन आसपासका सामुदायिक वनहरुमा पनि रुखहरु कटान भएका छन् ।