कोहलपुर, जेठ ११
उपप्रधान एवं भौतिक योजना तथा निर्माण मन्त्री विजयकुमार गच्छदारले छिन्चु जाजरकोट सडक अन्तर्गत सल्यानको देवस्थल र सुर्खेतको राकम जोड्ने भेरी नदीमा निर्माण भएको सडक पुलको उद्घाटन गरेका छन् । पुलको उद्घाटनसँगै यातायात सेवा संचालन हुन थालेको हो ।
११ बर्ष अघि निर्माण थालिएको पुल निर्माणको काम हालै सम्पन्न भएको हो । पुलको उद्घाटन गदै उपप्रधान मन्त्री गच्छदारले पुल निर्माणसँगै यस क्षेत्रका बासिन्दाको जनजीवन सहज हुने बताए । उनले २ बर्ष भित्र डोल्पा सदरमुकाम दुनैमा गाडी पुरयाउने दावी गरेका छन् । उनले आगामी ५ बर्ष भित्र उत्तर दक्षिण लोकमार्ग, भेरीकरिडोर लगायतका रणनैतिक सडकहरु निर्माण गरिने बताए । उनले डोल्पा सडक पुरयाउन यस सडक अन्र्तगत पर्ने विभिन्न पुल निर्माण र सडक निर्माणमा बजेटको कुनै कमी नहुने दावी गरे । २०६२ सालमा २ बर्षमा निर्माण सक्ने गरी पुल निर्माणको जिम्मा स्वच्छन्द ÷ काष्टमण्डप÷ धनथान÷ प्रदिप÷ रविन निर्माण सेवाले संयुक्त रुपमा लिएका थिए ।
तर, कामले गति लिन नसकेपछि कामको जिम्मा स्वच्छन्द निर्माण सेवा कम्पनीले लिएको हो । सडक निर्माणमा करीब १२ करोड रुपैया खर्च भएको सडक विभागका महानिर्देशक माधब कार्कीले बताए । १ सय ८० मीटर लामो पुलको निर्माण भएपछि यस क्षेत्रको विकासको ढोका खुलेको बताए ।
निर्माण कम्पनीले सडक डिभिजनका ईन्जिनियरको गलत लागत स्टमेटका कारण निर्माण कार्य ११ बर्ष लागेको आरोप लगाएको छ । लामो समयसम्म कम्पनीको लापरबाही र सरकारी उदाशिनताका कारण पुल निर्माणको काम लम्बिए पनि ढिलै भएपनि पुल बनेपछि स्थानिय खुसी भएका छन् ।
सरकारले शुरुमा गरेको स्टमेट विपरीत पिलरको जगमा ढुङ्गा लागेपछि निर्माण कम्पनीले तत्काल सरकारलाई स्टमेट परिवर्तन गर्न आग्रह गरेको थियो । सरकार र निर्माण कम्पनीका बिच लागत स्टमेटका बिषयमा बिबादले पुल निर्माणमा ढिलाइ भएपछि गत बर्ष सडक विभागले अन्तिम विकल्पका रुपमा माइक्रोपाइलिङ्ग प्रविधिबाट पुल निर्माण गर्न निर्माण कम्पनिलाई निर्देशन दिएको थियो ।
कम्पनीको यहि प्रविधिबाट पुल निर्माणको काम सकेको हो । पुल उद्घाटनपछि छिन्चु —जाजरकोट सडकको यातायात सेवा सहज हुने भएको छ । पुल उद्घाटनको खबरले जाजरकोट, रुकुम, सल्यान, डोल्पा, जुम्ला र सुर्खेत लगाएत जिल्लाका बासिन्दा खुशि भएका छन । पुल निर्माणपछि निर्माण सामग्री, खाद्यन्न लगायतका अन्य मालसमान ढुवानी र सिधा यातायात संचालनमा समेत सहजता आउने निर्माण ब्यवसायी संघ जाजरकोटका अध्यक्ष तेजविक्रम शाहले बताए । पुल निर्माणमा पहल गर्ने जाजरकोटका सभासदहरु र राजनैतिक दललाई जाजरकोटवासीले धन्यवाद दिएका छन् । उद्योग बाणिज्य संघ जाजरकोटका महासचिव बुद्धिबहादुर खत्रीले पुल निर्माण सँगै पटक पटक विग्रिरहने फेरीबाट यातायातका साधन तार्नु पर्ने झन्झट हटेको बताए । उनले अव ढुवानी तथा यात्रा सहज हुने बताए । जिल्लाबासीले बषौ देखी भोग्दै आएको यातायात असुविधा अव हटेर जाने उनले बताए । उद्घाटन कार्यक्रममा पुर्व गृहमन्त्री पुर्णबहादुर खड्का, सभासद् प्रकाश ज्वाला, हृदयराम थानी, तप्तबहादुर विष्ट, टेकबहादुर बस्नेत, रीता रावल लगायतको उपस्थिति रहेको थियो । पुल उद्घाटन गर्न गच्छदार सहितको जम्बो टोली हेलिकोप्टर चार्टर गरेर आएको थियो ।
मिसनटुडे संवाददाता
प्रकाशित मितिः मङ्लबार, जेष्ठ ११, २०७३