मर्मत भएनन् नेपालगन्जका सोलारबत्तीः बजेट १५ लाख विनियोजन, खर्च शून्य



सोलार सडक बत्ती जडानका लागि वैकल्पिक उर्जा प्रवद्र्धन केन्द्रले ७३ लाख रुपैयाँ सहयोग गरेको थियो । नेपालगन्जस्थित सुर्खेतरोडमा करिब दुई सयवटा सौर्यबत्ती जडान गरिएको थियो ।

तिमध्ये अहिले धेरै मर्मत गर्नुपर्ने अवस्थामा पुगेका छन् भने केही कामै नलाग्ने गरी बिग्रिएका छन् ।

नेपालगन्ज । 

नेपालगन्ज उपमहानगरपालिकाले चालू आर्थिक वर्षमा सोलार मर्मत गर्ने भन्दै १५ लाख रुपैयाँ विनियोजन गरेको छ । सोलार मर्मत कार्यक्रमलाई नगरस्तरीय तथा प्रवद्र्धनात्मक कार्यक्रम पनि भनिएको छ ।

दोस्रो चौमासिकको अन्तिमसम्म पनि उक्त शीर्षकबाट एक रुपैयाँ पनि खर्च हुन सकेको छैन । अर्थात नेपालगन्जका सडकमा राखिएका सोलर बत्ती मर्मत हुन सकेका छैनन् । बजेट नभइरै हो त ? त्यसो पनि होइन । मर्मत सम्भारका लागि बजेट भए पनि जनप्रतिनिधि र कर्मचारीको बेवास्ताका कारण सडकमा जोडिएका सडक बत्तीले उज्यालो छर्न सकेका छैनन् ।

नेपाल सरकारले २०७३ सालमा देशका मुख्यमुख्य सहरमा सौर्य बत्ति जडान गर्ने निर्णय गरेको थियो । सोहीअनुसार नेपालगन्जका सडकमा सौर्यबत्ती जडान भएका हुन् । यसका लागि वैकल्पिक उर्जा प्रवद्र्धन केन्द्रले ७३ लाख रुपैयाँ सहयोग गरेको थियो । नेपालगन्जस्थित सुर्खेतरोडमा करिब दुई सयवटा सौर्यबत्ती जडान गरिएको थियो । तिमध्ये अहिले धेरै मर्मत गर्नुपर्ने अवस्थामा पुगेका छन् भने केही कामै नलाग्ने गरी बिग्रिएका छन् ।

सोलारले काम गर्न छाडेपछि रात्रिकालीन यात्रा गर्ने सवारीसाधन र पैदल यात्रुलाई समस्या हुँदै आएको छ । केही सोलार भने जडान गरिएको वर्ष दिन नपुग्दै बिग्रिएका सर्वसाधारणहरुको भनाइ छ । गुणस्तरहीन सोलार व्यवस्थान हुँदा त्यसरी सोलारहरु बिग्रिएका हुन सक्ने स्थानीयको आशंका छ । विकासोन्मुख हुँदै गएको नेपालगन्जमा चहलपहल बढ्दो छ । अर्काेतिर रात्रिकालीन पर्यटन प्रवद्र्धनका लागि व्यवसाय सञ्चालन गर्न नगरले तयारी गरिरहेका छ । तर रात्रिकालीन व्यवसायका लागि अपरिहार्य हुने सडकबत्ती भने गुणस्तरीय हुन सकेको छैन ।

केही सोलार बत्ती बल्दै नबल्ने र केही सोलारले भने मधुरो उज्यालो दिएको नेपालगन्जका अजिव खाँले बताए । ‘सडकमा सौर्यबत्ती जडान हुँदा दिनमा त राम्रै देखिएको छ । दिउँसो उक्त बत्तीको काम छैन,’ उनले भने, ‘जब सौर्यबत्तीको आवश्यकता रातमा पर्छ त्यतिबेला बल्दैन ।

अँध्यारोमा आवतजावत गर्नुपरेको छ ।’ समयमै सोलार बत्ती मर्मत सम्भार नहुँदा नगर अँध्यरो भएको उनी बताउँछन् । सडक बत्ती बिग्रिँदा सडक अँध्यारो मात्रै भएको छैन, यसले सुरक्षा चुनौती पनि बढाएको छ । अँध्यारोमा चोरी, डकैती र अपराधिक क्रियाकलाप गर्ने समूह सक्रिय हुने सुरक्षा निकाय बताउँछ ।

सडक मर्मतका लागि बजेट हुँदा पनि समयमै खर्च नहुनु दुःखद् भएको नेपालगन्जका सन्देश केसीले बताए । ‘उक्त बत्ती मर्मतका लागि पैसा नभएर मर्मत नभएको रहेन छ,’ उनी भन्छन्, ‘तर, जनप्रतिनिधि र कर्मचारीको लापरबाही हुँदा अवस्था यस्तो छ ।’ नगरले समयमै मर्मत सम्भार नगरे पनि नागरिकले दबाब दिनुपर्ने उनी बताउँछन् ।

नेपालगन्ज उपमहानगरपालिकाले थप सोलार जडानका लागि ऊर्जा, जलस्रोत तथा सिँचाइ मन्त्रालयसँग बजेट माग गरेको लेखा अधिकृत भुपेन्द्र रावतले जनाए । उनका अनुसार मन्त्रालयले थप केही जवाफ दिएको छैन । सोलार मर्मत गर्ने प्रक्रिया अगाडि बढाउने तयारी भइरहेको उनको भनाइ छ ।

  • No tags available
प्रकाशित मिति : २०७८ चैत १ गते मंगलबार