पूर्वमन्त्री बडूद्वारा निर्वाचन नलड्ने घोषणा

धनगढी ।

नेपाली काँग्रेसका केन्द्रीय सदस्य तथा पूर्वमन्त्री दिलेन्द्रप्रसाद बडूले आगामी प्रतिनिधिसभा निर्वाचनमा आफ्नो उम्मेदवारी दर्ता नगर्ने घोषणा गरेका छन् । पार्टीले उनलाई दार्चुला जिल्लाबाट सर्वसम्मत रूपमा उम्मेदवार सिफारिस गरेको अवस्थामा पनि बडूले स्वतन्त्र निर्णय गर्दै निर्वाचनमा नलड्ने निर्णय गरेका हुन् ।

बडूले सार्वजनिक गरेको वक्तव्यमा आफूलाई सिफारिस गरेकोमा पार्टी नेतृत्वप्रति धन्यवाद व्यक्त गर्दै अब सक्षम र इच्छुक युवा पुस्तालाई अवसर दिन चाहेको बताएका छन् । ‘युवा साथीहरूलाई पालो दिने र उनीहरूलाई चुनाव जिताउने तयारीमा लाग्ने बेला आएको छ,’ बडूले आफ्नो पत्रमा उल्लेख गरेका छन् ।

दार्चुला काँग्रेसका सभापति ललित बोहराले भने, ‘पूर्वमन्त्री बडूले निर्वाचनमा नलड्ने सम्बन्धमा दिएको पत्र जिल्ला निर्वाचन कार्यालयमा दर्ता भइसकेको छ । यो निर्णय पार्टी र जिल्लाका लागि महत्वपूर्ण संकेत हो ।’ दिलेन्द्रप्रसाद बडूको राजनीतिक करियर लामो र सम्मानजनक छ । २०७९ सालमा उनले दार्चुलाबाट प्रतिनिधिसभा सदस्यमा निर्वाचित भएर पहिलोपटक राष्ट्रियस्तरमा आफूलाई प्रस्तुत गरेका थिए ।

त्यतिबेला उनले माओवादी केन्द्रका गणेश ठगुन्नालाई पराजित गर्दै पार्टीका लागि महत्वपूर्ण जित दिलाएका थिए । बडूको निर्वाचन विजयले नेपाली काँग्रेसलाई दार्चुलामा मजबुती प्रदान गरेको थियो । बडूले भनेका छन्, ‘म अब आफूलाई पृष्ठभूमिमा राख्दै युवा र इच्छुक साथीसँगै काम गर्नेछु, ताकि पार्टीले आगामी चुनावमा सफलता हात पारोस् ।’

दार्चुला काँग्रेसले बडूको निर्णयलाई सम्मान गर्दै आगामी चुनावका लागि तयारी थालिसकेको छ । सभापति ललित बोहराले भने, ‘हामीले नयाँ उम्मेदवारको छनोट प्रक्रियामा लागेका छौँ । बडूको मार्गदर्शनले हामीलाई रणनीति निर्माणमा सहयोग पु¥याउनेछ ।’ पूर्वमन्त्री बडू आफैँले भनेका छन्, ‘राजनीति केवल पद र सत्ता मात्र होइन । नेतृत्व सिर्जना, समाज सेवा र देशको हित प्राथमिकता हुनु पर्दछ । अब युवा साथीहरूले आफ्नो क्षमता देखाउन पाउँछन् भने पार्टी बलियो हुनेछ ।’