21 February 2024  |   बुधबार, फाल्गुन ९, २०८०

जनताको बीचमा हामीले आफ्ना कमजोरी स्वीकार्नै पर्छः बाँके संयोजक जेम्स

मिसनटुडे संवाददाता
प्रकाशित मितिः सोमवार, अशोज २९, २०८०  

भारतीय प्रधानमन्त्री नरेन्द्र मोदी कालापानी क्षेत्रका आएर पूजाआजा गरेर फर्केको भन्ने जुन कुरा छ यो खेदयोग्य कुरा हो । यसमा म खेद प्रकट गर्दछु । हाम्रो पार्टीले यसकार्यका लागि खेद प्रकट गर्दछ । बिना जानकारी अर्काको देशको भूमिमा आउनु भनेको हेपाहा प्रवृत्ति हो । नेपालप्रतिको गिद्दे नजर हो यो । ठूलो देश हुनुको अहमता हो यो । यस्तो कार्यलाई हाम्रो पार्टीले समर्थन गर्नै सक्दैन ।

नरेन्द्र पाण्डे ‘जेम्स’
संयोजक
नेकपा (माओवादी केन्द्र), बाँके

१. भारतीय प्रधानमन्त्री नरेन्द्र मोदी हालसालै नेपाली भूमिमा सुटुक्क भ्रमण गरेर फर्केका छन् । नेपाललाई कुनै जानकारी नै नदिई भारतीय प्रधानमन्त्रीले नेपाली भूमिमा भ्रमण गर्नु र सरकारले पनि मौनता साँध्नुलाई तपाईंको पार्टीले कसरी लिएको छ ?

यो एउटा गम्भीर विषय हो । हाम्रो पार्टी राष्ट्र र राष्ट्रियताका विषयमा प्रस्ट छ । हिजो हाम्रो पार्टी सुरुङ युद्ध गरेर आएको पार्टी हो । राष्ट्र र राष्ट्रियताप्रति हाम्रो पार्टीले कुनै गलत सम्झौता गर्न सक्दैन । भारतीय प्रधानमन्त्री नरेन्द्र मोदी कालापानी क्षेत्रका आएर पूजाआजा गरेर फर्केको भन्ने जुन कुरा छ यो खेदयोग्य कुरा हो ।

यसमा म खेद प्रकट गर्दछु । हाम्रो पार्टीले यसकार्यका लागि खेद प्रकट गर्दछ । बिना जानकारी अर्काको देशको भूमिमा आउनु भनेको हेपाहा प्रवृत्ति हो । नेपालप्रतिको गिद्दे नजर हो यो । ठूलो देश हुनुको अहमता हो यो । यस्तो कार्यलाई हाम्रो पार्टीले समर्थन गर्नै सक्दैन ।

२. हामी बाहिर भारतको विरोध त गर्छौं । हिजो तपाईहरू पनि सुरुङ युद्ध लड्नुभयो । क्षेत्रीय विस्तारवाद भन्दै भारतविरुद्ध लाग्नुभयो । तर आज पनि हामी भारतबिना बाँच्न सक्ने अवस्था छैन । नुन–तेल, दाल–चामल सबै कुरामा हामी भारतमै निर्भर छौँ । यस्तो कहिलेसम्म ?

एकैचोटि सबै कुरा हुँदैन । एउटा बिरुवामा पहिला कोपिला लाग्छ, फूल फुल्छ अनि फल लाग्ने हो । हाम्रो देश सानो छ । हाम्रा विकासका पूर्वाधारका काम धेरै बाँकी छन् । ती सेड्युलमा अगाडि बढ्दा हाम्रा अगाडि केही जटिलताहरू छन् । तर त्यो रोडम्यापमा, पाइपलाइनमा देशलाई अघि बढाउन सकिएको छ कि छैन भन्ने प्रमुख कुरा हो ।

अर्कोतिर नुनतेल, दालचामलको कुरा छ, यो द्विपक्षीय व्यापारको कुरा हो । कतिपय सामान त नेपालबाट भारततिर पनि त गइरहेको छ नि । दुई देशको व्यापारिक सम्बन्धका कुरा त चलिरहन्छन् । यो ठूलो कुरा होइन ।

३. भारत नेपालमा कुनै पनि कुरा राम्रो भएको देख्न चाहँदैन । यहाँका उद्योगधन्दा, कृषि उत्पादनलगायतमा पनि भारतको हस्तक्षेप हुनेगर्छ । नेपालप्र्रति भारतको यस्तो हेपाहा प्रवृत्ति किन चलिरहेछ ?

हामी राष्ट्रको अस्मिताप्रति झुकेका छैनौँ । मलाई लाग्छ, नेपालमा भएका प्रमुख पार्टीले आफ्नो राष्ट्रियता, राष्ट्रिय अस्मिताका बारेमा छलफल र बहस गरेकै छन् । राष्ट्र र राष्ट्रियताको सवाल भनेको कुनै एउटा पार्टीको विषय मात्र होइन । सबै पार्टीको अहम् सवाल हो । सानो देश भए पनि नेपालको आफ्नै स्वतन्त्र हैसियत छ ।

तर इतिहास हेर्दा पनि ठूला देशहरूले साना देशहरूलाई हस्तक्षेप गर्ने, हेपाहा प्रवृत्ति देखाउने गरेको पाइन्छ । विश्वका अन्य मुलुकहरू पनि ठूला र शक्तिशाली देशहरूले साना देशहरूमाथि यस्ता हेपाहा प्रवृत्ति देखाउने गरेका छन् । त्यसैले नेपालका सम्पूर्ण पार्टीहरूले राष्ट्रिय हितका सवालमा एउटै मत बनाउनुपर्छ ।

हामी आत्मनिर्भर हुने कुुरामा अगाडि बढ्यौँ भने अरूले हेप्ने प्रवृत्तिमा कमी आउँछ । हरेक सवालमा विकास निर्माणको सवालमा, उत्पादनको सवालमा, औद्योगिकीकरणको सवालमा कसरी आत्मनिर्भर हुने भन्ने कुरा हामीले सोच्नुपर्छ । त्यसैगरी राष्ट्रियतका सवालमा पनि सबै पार्टी कसरी एकताबद्ध भएर जाने भन्ने विषयमा व्यापक छलफल गर्नु आवश्यक छ ।

४. नेपालमा गणतन्त्र त आयो तर यसले जनताका आवश्यकता फेरि पनि सम्बोधन गर्न सकेन । विगतका जनताका त्याग र बलिदानीपूर्ण संघर्षबाट स्थापित गणतन्त्रबाट यति चाँडै आमजनताको आकर्षण घटेको छ । यो पुँजीवादी गणतन्त्र अब काम छैन । अब मुलुकमा समाजवादी गणतन्त्र आवश्यक छ भन्न थालिएको छ । के अब गणतन्त्र परिमार्जन आवश्यक भइसकेको हो त ?

होइन गणतन्त्रको परिमार्जन होइन, यसको विकास आवश्यक छ । कुनै पनि कुरा यथास्थितिमा रहँदैन । त्यसैले अबको बाटो के हो त भनेर हामीले सोच्नुपर्छ ।

५. आठ नौ वर्ष भइसक्दा पनि गणतन्त्रले लय समात्न सकेको त देखिएन नि ?

हामीले हिजो १० बर्से जनयुद्ध ग¥यौँ । यो जनयुद्ध भनेको जनताको जनवादका लागि थियो । लक्ष्य त हाम्रो जनताको जनवाद स्थापना गर्ने हो । समाजवादको स्थापना गर्ने हो । र अझ साम्यवादसम्म पुग्ने लक्ष्य हो । तर लक्ष्य प्राप्तिका लागि कार्यदिशा तय गर्ने प्रमुख कुरा हो ।

लक्ष्यमा पुग्नका लागि विभिन्न बाधा अड्चनहरू देखापर्ने गर्छन् नै । क्रान्तिको बाटो सीधा हुँदैन । तर अहिले नेपालमा हामीले जुन गणतन्त्रको स्थापना गरेका छौँ यो नेपाली जनताका लागि एउटा सुखद पक्ष हो । नेपाली जनताको जनमतबाट जितेका जनप्रतिनिधिहरूको सहभागिताबाट नेपालमा हामीले संविधानको निर्माण ग¥यौँ । यसैका माध्यमबाट अब समाजवादको यात्रामा अघि बढ्ने हो । देशलाई समाजवादको बाटोमा अगाडि बढाउनै पर्छ । यतिले पुग्दैन । तर गणतन्त्र असफल भयो भन्ने कुरा होइन ।

६. तपाईंको पार्टीले जनतासँग रूपान्तरण विशेष अभियान सञ्चालन गरिरहेको छ । यो अहिले कसरी अगाडि बढिरहको छ ?

हाम्रो पार्टीले अहिले तीनमहिने अभियान सञ्चालन गर्ने निर्णय गरेको छ । भदौ १६ देखि मंसिर १६ गतेसम्म हाम्रो यो अभियान चलिरहेको छ । करिब सवा महिना हामीले अभियान गरिसक्यौँ । यसबाट बाँकेमा मात्र होइन देशैभरि एउटा तरङ्ग पैदा भएको छ । माओवादी पार्टी हिजो जनताको बीचबाट जन्मेको पार्टी हो । माओवादी पार्टी ठूलो चुनौतीको बीचबाट जन्मेको पार्टी हो ।

माओवादी पार्टी संघर्षको मैदानबाट जन्मिएको पार्टी हो । तर पछि आउँदा जनता र पार्टीबीचको सम्बन्ध जुन सुमधुर हुनुपर्ने हो त्यो हुन सकेन । त्यसमा समस्या पैदा भयो । जनतासँग समन्वय गरे जाने कुरा, जनताका सुखदुःखसँग जोडिएर जाने कुरामा, जनताका हरेक समस्या हल गरेर जाने कुरामा हामी कहीँ न कहीँ अलि टाढा रह्यौँ भन्ने हाम्रो पार्टीको बुझाइ हो ।

त्यसकारण हाम्रो पार्टी केही सानो आकारमा आउनुपर्ने अवस्था पनि बन्यो । त्यसैले आफ्ना कमीकमजोरीहरूलाई पनि हामीले जनताको बीचमा स्वीकार गर्नुपर्छ भनेर हामी जनतामा जाने निर्णय गरेका हौँ ।

७. नेतृत्वबाटै रूपान्तरणको अपेक्षा आमजनताको छ । तर तपाईंहरू रूपान्तरण अभियान लिएर गइरहँदा तत्काल जनतालाई आकर्षित गर्नेखालका कसैको खेतमा धान काटिदिने, खेल खेलाएर मनोरञ्जन गराउने जस्ता काम गरिरहनुभएको छ । के यसले रूपान्तरण अभियानको खास उद्देश्य पूरा हुन्छ त ?

मैले भनेँ नि कहीँ न कहीँ हाम्रा समस्या रहे । हाम्रो नेतृत्वमा, पार्टी कार्यकर्तामा कतै न कतै कमीकमजोरी रहे । अब यसलाई स्वीकार गर्नुप¥यो । हामीले सञ्याउनुप¥यो । जनतासँग टाढा रहेर अब न पार्टी बलियो हुन्छ न विकास नै । त्यसैले आफ्ना कमीकमजोरीलाई एउटा लेबलमा हामीले जनतालाई बुझाएका पनि छौँ ।

८. कमीकमजोरी छ भनेर स्वीकार गर्ने, त्यस सच्याउनुपर्छ पनि भन्ने तर व्यवहारमा त्यो नदेखिने । यसले गर्दा तलका कार्यकर्ता वा आमजनतामा विश्वासको आधार त देखिएन नि ?

तपाईंले भनेजस्तो केही कुरामा समस्या छ । देशका युवाशक्तिलाई रोजगारी दिने कुरा, अन्य विकास निर्माणका कुरा, आर्थिक उत्पादनका कुरा, उद्योग कलकारखानालाई व्यवस्थित गर्ने कुरालगायतमा केही जटिलताहरू छन् ।

यसमा सरकारले सुधार गर्न नखोजेको पनि होइन । विस्तारै सुधारका काम पनि हुँदै छन् । सरकार त्यो दिशामा प्रयासरत छ । त्यसलाई पनि हामीले बुझिदिनुपर्छ । कुरामात्र गरेर मुलुकका जनताका सबै समस्या हल हुन्छन् भन्ने पक्षमा हाम्रो पार्टी पनि छैन ।

प्रकाशित मितिः सोमवार, अशोज २९, २०८०     12:42:21 PM  |