20 May 2024  |   सोमवार, जेष्ठ ७, २०८१

अमेरिकी साम्राज्यवादविरुद्ध जनमोर्चाको अभियान

मिसनटुडे संवाददाता
प्रकाशित मितिः आइतवार, जेष्ठ ७, २०८०  

नेपालगन्ज,
गणतन्त्र तथा राष्ट्रियताको रक्षा गरौं, संघीयता खारेज गरौं भन्दै राष्ट्रिय जनमोर्चा अमेरिकी साम्राज्यवादविरुद्ध मेची–महाकाली अभियान सुरु गरेको छ । जेठ १ गतेदेखि सुरु भएको उक्त अभियान शनिबार बाँके पुगेको छ ।
पहिलो चरणमा नेपालगन्जमा पत्रकार सम्मेलनमार्फत अभियानको जानकारी गराइएको थियो भने दिउसो कोहलपुरस्थित न्यूरोडमा सभा आयोजना गरिएको थियो । आफ्नो स्वार्थका लागि अमेरिकाले नेपालमा विभिन्न हस्तक्षेपकारी भूमिका खेल्दै आएकाले त्यसको अन्त्यका लागि मेची–महाकाली अभियान सुरु गरिएको राष्ट्रिय जनमोर्चाले जनाएको छ । अमेरिकाले नेपालमा केही धर्म, जाति र निश्चित संघसंस्थामार्फत नेपालमा गतिविधि गर्दै आएको राष्ट्रिय जनमोर्चाका महासचिव मनोज भट्टले जनाए । ‘चीनमाथि कारबाही गर्न अमेरिकाले उपयुक्त स्थान नेपाल ठानेको छ,’ उनले भने, ‘धर्म, जाति र समूहमार्फत अमेरिकाले आफ्ना गतिविधि बढाएको छ । यो नेपालको स्वाधीनता विरोधी काम हो ।’


अहिले नेपालमा अमेरिका, चीन र भारतले खुलेआम राजनीति गरिरहेको उनी बताउँछन् । साथै उनले अहिले चलेको भ्रष्टाचारी आन्दोलनमा भ्रष्टाचारीकै संलग्नता भएको आरोप लगाए । ‘पञ्चायत र राजतन्त्रमा अकूत पैसा कमाएका व्यक्ति अहिले अभियानमा लागेका छन्,’ उनी भन्छन्, ‘उनीहरुले गर्दा भ्रष्टाचारविरोधी आन्दोलन दूषित हुने खतरा छ ।’ भुटाणी शरणार्थी प्रकरणमा जोडिएकाहरु शीर्ष नेताहरुको संरक्षणमा रहेको आरोप लगाउँदै उनी भन्छन्, ‘शीर्ष नेताहरुको आम्दानीको स्रोत नै उनीहरु (भ्रष्टाचारी) हुन् । हेर्नु त, आम्दानीको स्रोत नभएका व्यक्ति कसरी विलासी जीवन बिताइ रहेका छन् ।’

अमेरिकाले पछिल्लो समय आफूनिकट राजनीति दलनै बनाएर संसद् र सरकारमा प्रभूत्व कायम गर्न खोजेको भन्दै उनले भने, ‘राष्ट्रिय स्वतन्त्र पार्टी (रास्वपा) त्यसैमध्येको एउटा हो । ‘यसोभन्दा तपाईंहरुलाई उक्त पार्टीले हामीभन्दा बढी सिट जितेको फ्रस्टेसनकोरुपमा नबुझ्नुहोला,’ उनी भन्छन्, ‘यो समयक्रमले पुष्टि गर्दै जानेछ ।’ अमेरिकाले पार्टीहरुमा घुसपैठ गरेर सरकारमाथि दबाब दिएर र भारतका माध्यमबाट आफ्ना साम्राज्यवादी उद्देश्यहरु पूरा गर्ने प्रयत्न गरिरहेकोमा अब आफ्नो प्रत्यक्ष निर्देशनमा चल्ने पार्टी बनाएको दाबी गरे ।

उनले अमेरिकाले इसाइकरणका लागि पनि ठूलो लगानी गरिरहेको र त्यसमार्फत पनि नेपालमाथि प्रभूत्व कायम गर्न खोजेको बताए । उनले अमेरिकाले इण्डोप्यासिफिक रणनीतिअन्तर्गत नेपाललाई चीनविरुद्ध युद्धको अखडा बनाउने उद्देश्य राखेको दाबी गरे ।

यस रणनीतिविरुद्ध आवाज उठाउनुपर्ने र संघर्षलाई बढाएर लैजानुपर्ने आवश्यकता रहेको महसुस गर्दै मेची महाकाली अभियान सञ्चालन गरेको राष्ट्रिय जनमोर्चाले जनाएको छ । जेठ १ गते कञ्चनपुरको महेन्द्रनगर र बाग्लुङबाट एकैसाथ सुरु भएको अभियान जेठ १५ गते कठमाडौं र बुटवलमा समापन गरिने छ । अभियानका क्रममा विभिन्न स्थानमा भेला र भण्डाफोर कार्यक्रमहरु सञ्चालन गरिने राष्ट्रिय जनमोर्चाले जनाएको छ ।

प्रकाशित मितिः आइतवार, जेष्ठ ७, २०८०     6:35:13 PM  |