16 April 2024  |   बुधबार, बैशाख ५, २०८१

जनताका गुनासो सुन्न गाउँमा कोहलपुरका जनप्रतिनिधि

मिसनटुडे संवाददाता
प्रकाशित मितिः बुधबार, चैत्र २२, २०७९  

कोहलपुर, कोहलपुर नगरपालिका वडा नम्बर १३ का बासिन्दाले जनप्रतिनिधिसँग पक्की पुल माग गरेका छन् । मंगलबार वडा नम्बर १३ का विभिन्न बस्तीको अनुगमनमा गएका जनप्रतिनिधिसँग वडावासीले पक्की पुल नहुँदा साह्रै समस्या भएको भन्दै उनीहरुसँग पक्की पुल निर्माण गरिदिन माग गरेका हुन् ।
प्रतिनिधिसभा सदस्य सूर्य ढकाल, कोहलपुर नगरपालिकाका नगर प्रमुख पूर्णप्रसाद आचार्य, उपप्रमुख संगीता सुवेदीसहित राजनीतिककर्मी सम्मिलित टोलीले वडा नम्बर १३ का सिम्रहवा, सिराह, जामुनाघारीका स्थानीयसँग यहाँका समस्याका विषयमा छलफल गरेको थियो ।

छलफलको क्रममा स्थानीयले विभिन्न योजना माग गरेका छन् । उक्त अवसरमा बोल्दै स्थानीय कमल खत्रीले वडा नम्बर १३ को मुख्य समस्या पुल अभाव र कटान रहेको बताए । विभिन्न बस्ती जोड्ने पुल नहुँदा वर्षौंदेखि समस्या भोग्दै आइरहेको खत्रीले बताए । स्थानीय खत्रीका अनुसार खोलाले बर्सेनि कटान गर्ने गरेका कारण निकै समस्या झेल्नुपरेको छ । अर्का स्थानीय कुलप्रसाद केसीले वडा सडक सञ्जालले समेत नजोडिँदा आवातजावतमा समस्या भएको बताए ।

वडा नम्बर १३ मा रहेको सिम्रहवा टोलमा भएको छलफलमा प्रमुख आवश्यकताको रुपमा पक्की पुल रहेको र पुल नहुँदा स्थानीयलाई आवातजावत गर्न, विद्यार्थीलाई विद्यालय जान र बिरामी पर्दा बिरामीलाई अस्पतालसम्म पु¥याउन निकै समस्या हुने दुखेसो सुनाए ।

वडा नम्बर १३ का वडाध्यक्ष डम्बरबहादुर खड्काका अनुसार भरैयादेखि सिम्रहवा र सिराह हुँदै सिम्रहवा जोड्न पक्की पुल निर्माण गर्ने विषयमा व्यापक छलफल भएको छ । वडाध्यक्ष खड्काले भरैयादेखि सिम्रहवासम्म जोड्ने पक्की पुल निर्माण गर्न अनुमानित २५ करोड लागत लाग्ने बताए । यस्तै सिराह हुँदै सिम्रहवा जोड्ने पुल निर्माणका लागि अनुमानित ६ करोड लागत आवश्यक रहेको वडाध्यक्ष खड्काको भनाइ छ । यस्तै वडा नम्बर १३ को प्रमुख समस्याको रुपमा रोहिणी खोलको कटानसमेत रहेको उनी बताउँछन् ।


‘महिला सुत्केरी हुँदा, स्थानीय बिरामी हुँदा वर्षायाम धेरै ठूलो समस्या छ । वर्षाको समयमा विद्यार्थीहरु विद्यालयसमेत जान पाउँदैनन् । यहाँको प्रमुख समस्या पक्की पुल र कटान हो । उहाँहरुले आश्वासन दिनु भएको छ । हेरांै, आगामी दिनमा के हुन्छ,’ वडाध्यक्ष खड्काले भने । गेरुवा खोला र रोहिणी खोलामा पुल नहुँदा वर्षायाममा समस्या हुने गरेको छ । वडा नम्बर १२ र १३ हुँदै बग्ने रोहिणी खोलाले यस क्षेत्रका २५ सय मिटरभन्दा बढी खेतीयोग्य जमिन कटान गरिसकेको छ ।

एक हजार मिटर नम्बरी र एक हजार पाँच समय मिटर प्रतिऐलानी खेतीयोग्य जमिन कटान गरिसकेको वडा नम्बर १३ को कार्यालयले जनाएको छ । उक्त वडामा बाँके राष्ट्रिय निकुञ्ज क्षेत्र पनि पर्ने भएकोले जंगली जनावरको समेत उत्तिकै त्रास छ । वडा नम्बर १३ का विभिन्न बस्तीमा बाघ र चितुवाको डर छ । जंगली जनावरहरुले खेतबारीमा लगाएका बालीनालीमा नोक्सानी पु¥याउने गरेका छन् । स्थानीयले निकुञ्ज क्षेत्रको समस्या समाधानका लागि पनि जनप्रतिनिधिहरुसँग माग गरेको खड्का बताउँछन् ।
उक्त अवसरमा बोल्दै प्रतिनिधिसभा सदस्य सूर्यप्रसाद ढकालले वडा नम्बर १३ मा रहेका समस्यासँग आफू परिचित भएको बताए । यहाँ रहेका समस्या समाधानका लागि आफूले व्यक्तिगतरुपमा पनि पहल गर्दै आएको र अझै यहाँको सेवकका रुपमा काम गर्ने उनले बताए । स्थानीयको पक्की पुल निर्माण गर्नुपर्ने मागका सम्बन्धमा उनले आगामी पाँच वर्षभित्र उक्त क्षेत्रमा कुनै पनि हालतमा पक्की पुल निर्माण गर्ने प्रतिबद्धता जनाए । पुल निर्माणका लागि स्थानीय सरकार र संघीय सरकारका जनप्रतिनिधि एकजुट भएर अघि बढ्ने प्रतिनिधिसभा सदस्य ढकालको भनाइ छ ।
यस्तै कोहलपुर नगरपालिकाका नगर प्रमुख आचार्यले पुल निर्माणका लागि स्थानीय सरकारले गर्न सक्ने पहलमा कुनै कसर बाँकी नराख्ने बताए ।

प्रकाशित मितिः बुधबार, चैत्र २२, २०७९     11:23:47 AM  |