नेपालगन्ज ।
ऐन र नीति संशोधनसहित पारित गर्दै नेपालगन्ज उपमहानगरपालिकाको १०औँ नगरसभा सम्पन्न भएको छ । आइतबार सम्पन्न नगरसभाले एउटा ऐन र एउटा नीति पारित गरेको थियो ।
नगरसभाले भूउपयोग र जग्गा व्यवस्थापनलाई व्यवस्थित, वैज्ञानिक, पारदर्शी बनाउने उद्देश्यका साथ भूउपयोग ऐन संशोधनसहित पारित गरेको प्रवक्ता प्रमोद रिजालले जानकारी दिए ।
यस्तै नगरसभाले नगर सञ्चार नीति–२०७८ पनि संशोधनसहित पारित गरेको छ । नेपालगन्ज उपमहानगरपालिका र वडा कार्यालयहरुको आर्थिक विवरण र रकमान्तरण गर्ने निर्णयसमेत नगरसभाबाट भएको छ । नगरसभामा नगर प्रमुख डा. धवलशम्शेर राणाले आफूहरुको कार्यकाल सफल भएको दाबी गरे ।
कार्यपालिकामा चारवटा पार्टीको प्रतिनिधित्व भए पनि सहमतिका आधारमा निर्णय हुने गरेको स्मरण गर्दै उनले ५ बर्से कार्यकाललाई सुनौलो समयको रुपमा लिनुपर्ने बताए ।
‘विकास कार्य निरन्तर चल्छ । चालू आर्थिक वर्षका कार्यक्रम छिटोभन्दा छिटो सम्पन्न गर्न जनप्रतिनिधि र कर्मचारीहरुमा आग्रह गर्दछुँ,’ उनले भने ।
प्रतिक्रिया दिनुहोस्