मिसनटुडे संवाददाता
प्रकाशित मितिः सोमवार, साउन ११, २०७८
जनता समाजवादी पार्टी (जसपा)का अध्यक्ष उपेन्द्र यादवले गल्ती सच्याएर आए महन्थ ठाकुर तथा राजेन्द्र महतोलाई पनि पार्टीमा स्थान दिन सकिने बताएका छन् ।
पार्टी आधिकारिकता विवादलाई टुंग्याउने क्रममा केन्द्रीय कार्यकारिणी सदस्यहरूको सनाखतका लागि निर्वाचन आयोग पुगेका अध्यक्ष यादवले आत्मालोचना गरेर आए विचार गर्न सकिने बताएका हुन् ।
‘हामीले घोक्र्याएर पठाएको होइन । उहाँहरू बाटो बिराउँदै बिराउँदै कहाँ पुग्नुभयो । गलत बाटोमा, गलत राजनीतिमा पुग्नुभयो,’ यादवले भने, ‘हामीले गेटमा ताला लगाएका छैनौं । साथीहरू आफूले गरेका गल्तीलाई स्वीकारेर, आत्मालोचना गरेर आए विचार गर्न सकिन्छ ।’
त्यसक्रममा यादवले ५१ सदस्यीय केन्द्रीय कार्यकारिणी समितिका ३४ सदस्यले आफ्नो पक्षमा हस्ताक्षर गरेको जानकारी दिए ।