कोहलपुर : मानव बेचबिखन तथा ओसारपोसर विरुद्ध युवाहरुका लागि अभिमुखिकरण सम्पन्न भएको छ । समाजको प्रमुख समस्याका रुपमा रहेको मानव बेचबिखन तथा ओसारपोसार विरुद्ध युवाहरुको भूमिकाको विषयमा जानकारी दिनको लागि अभिमुखिकरण कार्यक्रम सम्पन्न भएको हो । हाम्रो आवाज ः चेलबेटी बेचबिखनबाट मुक्त समाज भन्ने मूल नारा सहित बाँकेमा विभिन्न संघ संस्थाले लामो समयदेखि काम गरिरहेका छन् । सीमा क्षेत्र हुने यस्ता गतिविधिका विरुद्धमा माइती नेपाल नेपालगन्ज, बाँकेले लामो समयदेखि काम गर्दै आएको छ ।
शनिबार जिल्लाको कोहलपुर नगरपालिका वडा नम्बर १४ को वडा कार्यालयमा अभिमुखिकरण कार्यक्रम आयोजना गरिएको थियो । माइती नेपाल नेपालगन्ज, बाँकेको आयोजना र समाज सेवा संस्था नेपाल कोहलपुर,बाँकेको समन्वयमा अभिमुखिकरण कार्यक्रम सम्पन्न भएको हो । कार्यक्रमको सहजीकरण माइती नेपाल क्षेत्रीय कार्यालय नेपालगन्जका संयोजक केशव कोइरालाले मानव बेचबिखन यहाँको प्रमुख समस्याको रुपमा रहेको बताए । उनले विभिन्न बाहनामा दक्षिणी छिमेकीदेखि तेस्रो मुलुकमा बेच्ने क्रम बढेको बताए । मानव बेचबिखन तथा ओसारपसारमा सबै भन्दा बढी युवाहरु परेको भन्दै उनले यसका विरुद्ध युवाहरु नै सक्रिय हुनुपर्ने उनले बताए । उनका अनुसार यस्तो समस्या समाधानका लागि सबै सरोकारवाला निकायहरुको सहयोग आवश्यक छ । ‘यो अहिलेको साझा समस्या हो ।
यसका विरुद्धमा शसक्त अभियान सञ्चालन गर्नुपर्छ । यसमा युवाहरुको भूमिका अहम छ ।’ उनले भने । उक्त कार्यक्रमको समन्वय गरेको समाज सेवा संस्था नेपाल कोहलपुरका अध्यक्ष विनोद थापाले साझा समस्याका रुपमा रहेको मानव बेचबिखन विरुद्ध सबैको साझा प्रतिबद्धता र सक्रियता आवश्यक छ । अध्यक्ष थापाले संस्थाहरुले लामो समयदेखि काम गरिरहेको भन्दै सरकारले पनि यस्ता विषयमा विशेष ध्यान दिनुपर्ने बताएका थिए ।
समाज सेवा संस्थाले पनि समाजका हुने गरेको यस्ता समस्या समाधानका लागि विभिन्न तवरमा जनचेतना मुलक कार्यक्रम गरिरहेको पनि जानकारी दिए । कार्यक्रममा सहभागी युवा दिनेश थापाले मानव बेचबिखन तथा ओसारपोसार विरुद्धको अभियानको लागि युवालाई सचेत गराउनु आवश्यक रहेको बताए । उनले पछिल्लो समय बेरोजगारी तथा विभिन्न कुलतका कारण युवा पुस्तामा नराम्रो काममा फस्दै गएको पनि बताए ।
यसको लागि सरकारले पनि ध्यान दिनुपर्छ । अभिमुखिकरण कार्यक्रममा सहभागी कोहलपुर नगरपालिका वडा नम्बर १४ का वडा सदस्य मन बहादुर गुरुङले स्थानीय सरकारले पनि यस्ता कार्यमा सक्रियपूर्वक काम गरिरहेको बताएका थिए । अभिमुखिकरण कार्यक्रममा ५० जना बढी युवाहरूको सहभागिता रहेको थियो ।
प्रतिक्रिया दिनुहोस्