नाकामा बाह्रैमास समस्या



शिवु खनाल । दाङ ।

भारतसँग जोडिएका दाङ राजपुर र गढवा गाउँपालिका अन्तरगत क्षेत्रमा पर्ने सीमाक्षेत्रको दक्षिणी चुरे भेगका मानिसहरू बाह्रैमास कष्टकर दैनिकी गुजार्न बाध्य भइरहेका छन् । छिमेकी राष्ट्र भारतसँग जोडिएको पूर्वको अर्नादेखि पश्चिम भौवानाका चुरे भागमासम्मका सीमाक्षेत्रमा बसोबास गर्दै आइरहेका नाकाबासीहरूले सडक, बिजुली बत्ती, खानेपानी लगायतको अभावमा कष्टकर दैनिकी गुजार्नु परेको हो ।

भारतसँग जोडिएको कोइलाबास नाका बाहेक अन्य यहाँका चुरे भेगका अधिकांश नाकाहरूमा सडक पुगेको छैन । खहरे खोलाको बगर र गोरेटो बाटो हुँदै भारतसँग जोडिएका अधिकांश नेपाली भु–भाग एवम् बस्तीहरूमा पुग्नुपर्ने बाध्यता रहेको छ ।

विकट बस्ती भएता पनि नाका सबै बस्ती गाउँपालिका भित्र पर्छन् । त्यस क्षेत्रमा विरामी हुदा औषधी उपचार गर्न वा दैनिक उपभोग्य बस्तु खरिद गर्न भारतीय बजारको भरपर्नु बाध्यता रहेको छ । हिउँदको समयम मोटरसाइकल चले पनि वर्षायामको बेला बन्द हुने राजपुर गाउँपालिका वडा नम्बर ७ भैसाहीँनाका निवासी पूर्णबहादुर रोकाले बताए ।

हालसम्म सडक सञ्जालसँग नजोडिएका दाङका ३४ वटै नाकाक्षेत्रका बस्तीहरूमा हिउँदका महिना खहरले खोलाका बगर र ठाडो पहाडबाट मोटरसाईकल गुड्ने गरेको छ । भारतसँग जोडिएका दाङका अधिकांश सिमाक्षेत्रका बस्तीमा गाडि अझैसम्म पुगेका छैनन् । अति दुर्गम र विकटताका कारण सिमाक्षेत्रमा भरपर्दो स्वास्थ्य सेवासमेत पुग्न सकेको छैनन् ।

पूर्वपश्चिम राजमार्गसग जोड्छुः  सांसद चौधरी

प्रतिनिधिसभा सदस्य मेटमणी चौधरीले समग्र भारतसँग जोडिएको सीमा क्षेत्रमा विकास गर्ने बताएका छन् । प्रतिनिधिसभा सदस्य चौधरीले सोमवार स्थानीय नाकाबासीसँग समग्र नाकाको विकासमा वृहत् छलफल गरेका थिए ।

उनले निर्वाचन क्षेत्र नम्बर १ अन्तरगत पर्ने भारतसँग जोडिएको पूर्वको अर्ना नाकादेखि पश्चिमको भौवनाकाको विकासको लागि स्थानीय नाकाबासीसँग छलफल गरेका हुन् । स्थानीय नाकाबासीले नाकामा शिक्षा, स्वास्थ्य, खानेपानी, संचार, यातायात, विद्युत् लगायतको समस्याबारे छलफलमा प्रतिनिधिसभा सदस्य चौधरीलाई ध्यानाकर्षण गराएका थिए ।

‘पहिलेको तुलनामा नाकामा अहिले राज्यको उपस्थिति राम्रो छ । चहलपहल पनि बढेसंगै, राजधानीबासी पनि भएकोमा खुसि लागेको छ’ स्थानीय टंक विकले भने, ‘अब नाकाको विकासमा अलि बढि चासो दिनुप¥यो ।’

यता प्रतिनिधिसभा सदस्य चौधरीले भारतसँग जोडिएको दाङको सीमाक्षेत्रको विकास बारे दिर्घकालीन योजना बनाएर अघि बढ्ने बताएका थिए । ‘विकास गर्छु तर, विकास गर्न वृहत् गुरूयोजना बनाउन आवश्यक छ’ उनले भने, ‘सिमा क्षेत्रमा बसोबास गर्दै आउनु भएका स्थानीयलाई पूर्वपश्चिम महेन्द्र राजमार्गसँग जोड्ने केन्द्रीय सरकारसँग छलफल गरिरहेको छु ।’

  • No tags available
प्रकाशित मिति : २०७८ असार २९ गते मंगलबार