16 July 2024  |   मङ्लबार, साउन १, २०८१

निर्वाचन भयरहित बनाउन प्रधानमन्त्री देउवाको निर्देशन

मिसनटुडे संवाददाता
प्रकाशित मितिः बुधबार, कार्तिक २९, २०७४  

नेपालगञ्ज, २९ कात्तिक/   प्रदेश नं. ५ र ६ को सुरक्षा प्रमुखहरुको भेलालाई नेपालगन्जमा सम्बोधन गर्दै प्रधानमन्त्री शेर बहादुर देउवाले आगामी मंसिरमा हुने प्रतिनिधिसभा र प्रदेश सभाको निर्वाचनलाई भयरहित वातावरणमा सम्पन्न गराउन सुरक्षा प्रमुखहरुलाई निर्देशन दिएका छन् । निर्वाचनमा चुस्त, दुरुस्त, भरपर्दो र विश्वासिलो सुरक्षा व्यवस्था मिलाउन तीन वटै सुरक्षा निकायका अधिकारीहरुलाई विशेष निर्देशन समेत दिएका हुन् ।
प्रधानमन्त्री देउवाले निर्वाचनमा मतदातालाई समयमै मतदान गर्ने वातावरण श्रृजना गराउन सुरक्षा निकायको विशेष भूमिका हुने भन्दै त्यसलाई गम्भिरतापूर्वक लिन निर्देशन दिए ।
पश्चिम नेपालको चुनावी अभियानलाई लक्षित गरेर नेपालगञ्ज आएका प्रधानमन्त्री देउवाले प्रदेश नं. ५ र ६ मा पर्ने जिल्लाका सुरक्षा र प्रशासनिक निकायका प्रमुखहरुसँग यस क्षेत्रको शान्ति सुरक्षाको अवस्था, आगामी निर्वाचनका लागि गरिएको सुरक्षा व्यवस्था र निर्वाचनलाई शान्तिपूर्ण रुपमा सम्पन्न गराउन देखिएका चुनौतीहरुको बारेमा जानकारी लिएका थिए ।
सुरक्षा योजना निकै राम्रा बनेको भएपनि कार्यान्वयनमा चुनौती देखिएको बताउँदै देउवाले केही जिल्लाहरुमा सानातिना घटनाहरु भइरहेका भएपनि त्यसको सुक्ष्मरुपमा अनुसन्धान बढाउनु पर्ने बताए ।
कार्यक्रममा बोल्दै गृह मन्त्रालयका सचिव मोहोनकृष्ण सापकोटाले भयरहित, अवरोध विना मतदानको ग्यारेन्टी गर्नु सबै सुरक्षा निकायको दायित्व भएको बताउँदै त्यसबाट कुनै पनि हालतमा चुक्न नहुने बताए । निर्वाचनका लागि भारतसँगको खुला सिमाना, विभिन्न जिल्लामा भइरहेका हिंसात्मक गतिविधि, पार्टीहरुबीच हुन सक्ने झडप मुख्य चुनौतीका रुपमा रहेकाले यस्ता गतिविधिहरु प्रति सुरक्षा संयन्त्रहरु सचेत रहनुपर्ने उनले बताए ।
क्षेत्रीय सुरक्षा गोष्ठिमा १६ जिल्लाका सुरक्षा प्रमुखहरुको सहभागिता रहेको थियो । बाँके, बर्दिया, सुर्खेत, दाङ्ग, पुर्वी रुकुम, पश्चिम रुकुम, रोल्पा, दैलेख, जाजरकोट, जुम्ला, हुम्ला, कालिकोट, डोल्पा, सल्यान, प्यूठान गरी (प्रदेश नं. ५ र ६ का शसस्त्र प्रहरी, नेपाल प्रहरी , नेपाली सेना, राष्ट्रिय अनुसन्धान सहितको उच्च सुरक्षा अधिकारीहरुको सहभागिता रहेको छ ।

प्रकाशित मितिः बुधबार, कार्तिक २९, २०७४     7:16:46 AM  |