27 May 2024  |   सोमवार, जेष्ठ १४, २०८१

संघले भन्यो,– ‘यी नाकाबाट तस्करी भइरहेको छ,रोक’

मिसनटुडे संवाददाता
प्रकाशित मितिः शनिबार, फाल्गुन १२, २०८०  

नेपालगन्ज।
नेपालगन्ज उद्योग वाणिज्य संघले उपप्रधानमन्त्री एवं गृहमन्त्री नारायणकाजी श्रेष्ठलाई १४ बुँदे ज्ञापनपत्र बुझाएको छ । संघका अध्यक्ष टंकबहादुर धामी, महासचिव भीमबहादुर रानाभाटले गृहमन्त्री श्रेष्ठलाई ज्ञापन बुझाएका हुन् ।संघले जमुनाहा नाकाको पूर्व र पश्चिमको १–१ किलोमिटरको दूरीमा आधा दर्जनभन्दा बढी तस्करी गर्ने नाकाहरू रहेको जनाएको छ ।

त्यहाँबाट हुने चोरी पैठारी र राजस्व छली रोक्न लामो दूरीको सिसी क्यामेरा जडान गरेर कडा निगरानी गर्नसमेत माग गरिएको छ । साथै त्यस्ता सामग्री ढुवानी हुने बाटोहरूमा पनि सिसी क्यामेरा जडान गरी अनुगमन बढाउन अनुरोध गरिएको छ ।सशस्त्र द्वन्द्वको समयमा बन्द गरिएका बाँकेका साइगाउँ, भनघोटना, खडैचा, उढरापुर, भगवानपुर, नरैनापुर र सुइयाबघौडामा छोटी भन्सार सञ्चालन गरेर अवैध आयात नियन्त्रण तथा राजस्व वृद्धिका लागि पहल गर्न माग गरिएको छ ।

संघले लामो समयदेखि भारतमा किनमेल गर्न जानेलाई कडाइ गर्न आग्रह गरेको छ । भारतीय बजारमा किनमेल गरेर आउनेलाई कडाई नहुँदा राजस्व चुहावट भइरहेको संघका अध्यक्ष धामीको भनाइ छ ।संघले सय रुपैयाँभन्दा माथिको सामान ल्याउँदा भन्सारको दायरामा ल्याउन अनुरोध गरिरहेको छ ।

संघले नाकामा स्क्यानर र फेस रिडर राख्न अनुरोध गरेको छ । नेपालबाट भारतमा किनमेल गर्न जानेको परिचय खुल्ने कागजात हेर्न अनुरोध गरिएको छ । संघले विशेष गरेर सरकारी गाडीमा किनमेल गर्न जानेलाई कडाइका साथ कारबाही गर्न माग गरेको छ ।

नेपाल प्रहरीका विभिन्न तहका कर्मचारीहरू सरुवा भएर पनि सम्बन्धित जिल्ला नगई काज मिलाएर बाँकेमा नै बसेर देश र जनताको सुरक्षाभन्दा व्यक्तिगत हितमा लागेको, जिल्लाको सुरक्षा योगदान नगरेको पाइएकाले तत्काल सरुवा भएको कार्यालयमा नै पठाउने व्यवस्था मिलाउन आग्रह गरिएको छ ।

प्रकाशित मितिः शनिबार, फाल्गुन १२, २०८०     7:47:09 AM  |