काठमाण्डौँ, ५ माघ/ राष्ट्रियसभा सदस्य निर्वाचन प्रयोजनका लागि दर्ता भएका राजनितिक दललाई निर्वाचन आयोगले चुनाव चिह्न प्रदान गरेको छ । निर्वाचन आयोगमा दर्ता भएका २१ वटा राजनितिक दललाई आयोगले आज चुनाव चिह्न प्रदान गरेको हो ।
यहि माघ २४ हुने राष्ट्रियसभा सदस्यको निर्वाचनमा २ हजार ५६ जना मतदाताले भाग लिंदैछन् । गाउँपालिका र नगरपालिकाका प्रमुख र उपप्रमुख तथा प्रदेशसभा सदस्य राष्ट्रियसभा सदस्यमा मतदाता हुने संवैधानिक व्यवस्था रहेको छ ।
कूल ५९ सदस्यीय राष्ट्रियसभामा सरकारको सिफारिशमा तीनजना सदस्य राष्ट्रपतिबाट मनोनयन हुनेछन् । आयोगले नेकपा एमालेलाई (सूर्य), नेपाली काँग्रेस (रुख), नेपाल कम्युनिष्ट पार्टी (माओवादी केन्द्र) (गोलाकारभित्र हँसिया हथौडा), संघीय समाजवादी फोरम नेपाल (हातले समातेको मसाल) र राष्ट्रिय जनता पार्टी नेपाललाई छाता निर्वाचन चिह्न प्रदान गरेको छ ।
यस्तै नेपाल संघीय समाजवादी पार्टीलाई (बस), नेपाल मजदूर किसान पार्टी (मादल), संघीय लोकतान्त्रिक राष्ट्रिय मञ्च (दापसहितको खुकुरी), बहुजन शक्ति पार्टी (जग), नेपाल परिवार दल (साँचो), राष्ट्रिय जनमोर्चालाई (गिलास), नेपाल नौलो जनवादी पार्टी (चुच्चोले चिट्ठी बोकेको परेवा) चिन्ह दिइएको छ ।
यसैगरी, राष्ट्रिय प्रजातन्त्र पार्टी प्रजातान्त्रिकलाई (गोलाकारभित्र हलो), विवेकशील साझा (तराजु), नयाँ शक्ति पार्टी नेपाल (देब्रे आँखा), नेपाल दलित पार्टी (इनार), राष्ट्रिय प्रजातन्त्र पार्टी (गाई), बहुजन समाज पार्टी नेपाल (जिराफ), गान्धीवादी पार्टी नेपाल (भेडा), नेपाली जनता दल (गोरुगाडाको चक्का पाङग्रो) र राष्ट्रिय मुक्ति आन्दोलन नेपालका उम्मेदवार (षट्कोण) चुनाव चिह्नबाट प्रतिस्पर्धा गर्ने निर्वाचन आयोगले जनाएको छ ।
प्रतिक्रिया दिनुहोस्